«ДУЭЛ» ДАРС БЎЛДИ... Бугун Республика Ёш Ижодкорлар Кенгаши | Yosh ijodkorlar kengashi - Duel
«ДУЭЛ» ДАРС БЎЛДИ...
Бугун Республика Ёш Ижодкорлар Кенгаши томонидан ўтказилаётган «Дуэл» танловининг вилоят босқичида бадиий таржима йўналишида қатнашиб ғолиб бўлдим.
Бир томондан хурсанд бўлишга арзийди. Лекин ростини айтганда, ўзимни ғолибликка даъвогар сифатида кўра олмагандим. Тўғри, сиз каминани ижтимоий тармоқлар, уёқ-буёқда эълон қилинган таржима ишлари орқали ҳаминқадар танишингиз мумкин. Бироқ нисбатан таниқли бўлиш ҳеч нарсани англатмаслигини, фақатгина тинимсиз меҳнат кишини юксалтиришини яна бир карра англадим.
Бугунги қатнашчиларнинг ҳар бири илмли, чет тили ва ўз она тилини чуқур биладиган, салкам етилиб қолган мутаржимлар эди. Уларнинг олдида ҳатто финалгача етиб борармиканман деган ваҳима босганини яшириб ўтирмайман. Аслида ҳам шундай бўлди, жуда баҳсли вазиятда бир амаллаб финалга чиқдим. Финалдаги дўстим Комилжон Маматов (@komiljonmamatov_official) менга қараганда суяги қотганроқ, қўли келишганроқ экан. Аммо кутилмаганда ҳакамлар мени ғолиб сифатида эълон қилишди. Менинг биринчи ўринга илиниб қолишимга сабаб (жуда камтарлик қиляпти деб энсангиз қотмасин, чиндан ҳам Комилжоннинг истеъдодига дўстона тан бераман) илгарироқ қилинган шеърий таржималар бўлди. Шеърий ўгирманинг мураккаблиги, алоҳида билим ва маҳорат талаб этилиши жиҳатдан шу қарорга келишганини айтишди.
Ростини айтганда, бугун анчагина ўзимга келдим: ғафлат босган юзимга муздек сув сепилгандай бўлди гўё. Сўнгги пайтларда умуман бошқа масалаларга чалғиб, тирикчилик қилишга берилиб бадииятдан, таржимадан бегонасираб қолганимни яққол сеза олдим. Танқидлар остида қолганим ҳам бекорга эмас. Бир нарса маълумки, мени ғолибликка бир йилча бурун қилинган ўгирмалар етаклади, боиси охирги босқичда эски машқларни ўқиб бердим. Асосийси шуки, дуэл менга кўзгу бўлди, юзимга сергаклантирувчи тарсаки тортди, ўзимга келтирди. Насиб этса вилоят номини муносиброқ ҳимоя қилишга бел боғлайман. Ўз устимда кўпроқ ишлайман.
Виждонан айтганда, Республика босқичида бугун таниган дўстим Комилжон ҳам қатнашишини истардим!
Дуэл мутасаддилари ва ҳакамларига муносиб кўрганлари, «тирилтирганлари» ҳамда янги дўст топишимга сабабчи бўлганлари учун ташаккур!
Эҳтиром ила Шохрух Усмонов
08.07.2021
@sheriston
