БОЙ БЕРДИК... (Бугунги авлод ҳақида ўйлар) Бошдан оёқ ясатиб | Hayot Maktabi

БОЙ БЕРДИК...
(Бугунги авлод ҳақида ўйлар)

Бошдан оёқ ясатиб,
Зеб бердик, чирой бердик.
Оғзига тутиб ошни,
Қаймоғу ширмой бердик.
Солдик қаср-иморат,
Минсин дея “той” бердик.
Эркаладик, сийладик,
Тўй томоша,”мой” бердик.
Нима қилсак қилдик биз,
Aвлодимиз бой бердик.

Қўлда тутмади кетмон,
Роҳат ичра ширин жон,
Пешонадан оқмас тер,
Ҳақ, дея қайнамас қон.
Тутун босган мўридек,
Моғор босдику виждон.
Боримиз қилдик тортиқ,
Юлдуз бердик, ой бердик.
Ғафлатда биз катталар.
Кичикларни бой бердик.

Китобмас, нур-зиёмас,
Эрта-ю кеч пул тутдик.
Она сути оғзида,
Гўдакларга гул тутдик.
Ҳаёт, заҳмат азобин,
Машаққатин сир тутдик.
Ўн еттида уйлантиб,
Сулув-гулчирой бердик.
Нима қилсак қилдик биз,
Aвлодимиз бой бердик.

Босиб келди тўфондек,
Ғарбнинг турфа балоси,
Интернет, мобил телефон,
Тик-ток, телеғaвғоси.
Эй воҳ, йигит-қиз, жувон,
Маишатнинг шайдоси.
Оқибат бўлди унут,
Aхлоқсизга жой бердик,
Телба, тескари тентак...
Биз авлодни бой бердик.

...Ислом, иймон, диёнат,
Ҳақ йўлидан йироқмиз,
Шайтонга эш бандамиз,
Илмсиз, гўл-гумроҳмиз,
Дилда сўнгги пушаймон,
Беҳудага оҳ-воҳмиз.
Вақтни совурдик елга,
Елкаси тоғ-гуноҳмиз.
Тўпладик, тўкдик, сочдик,
Эй воҳ, хойнаҳой бердик,
Усмон англар энди кеч,
Боримизни бой бердик.

Бобоқул Усмон

Yaqinlaringizga ham ulashing https://t.me/joinchat/Tma-ItwxZl0dyahB

HAYOT MAKTABI KANALIGA OBUNA BO'LING

https://t.me/Ibratli_Motivatsiya_pisixologiya