#Bilesizbe Tólem-kontrakt tiykarında oqıw ushın tálim kred | Huqıqıy málimleme QR

#Bilesizbe

Tólem-kontrakt tiykarında oqıw ushın tálim kreditlerin ajıratıw tártibi

Tálim kreditleri bilimlendiriw shólkemleri bakalavr hámde magistraturanıń kúndizgi, sırtqı hám keshki bilimlendiriw formasında tólem-kontrakt tiykarında oqıwǵa usınıs etilgen yaki qabıl qılınǵan, sonday-aq, oqıwın kóshirgen Ózbekstan puqarası bolǵan studenlerge beriledi.


Bunda, kredit alıwshınıń turaqlı dáramat deregine iye shańaraq aǵzaları (ata-anası, aǵa-inisi, apa-sińlisi, kiyewi yaki hayalı) yaki qáwenderleri birgelikte kredit alıwshı retinde qatnasıwı múmkin.

Tálim kreditiniń tiykarǵı qarzı studenttiń rásmiy oqıw múddeti tamamlanǵannan soń jetinshi aydan baslap 7 jıl dawamında qaytarıladı.

Tálim kreditin alıw ushın Finans ministrliginiń rásmiy veb-saytında járiyalanǵan kommerciyalıq banklerine tómendegi hújjetler usınıladı:

arza;
tólem-kontrakt shártnaması hám oǵan qosımsha etiletuǵın esap beti/fakturası (bar bolǵanda). Shártnamada oqıwdı tamamlawdıń belgilengen múddeti hám bir jıl ushın tólem muǵdarı kórsetilgen bolıwı lazım;
tálim krediti qaytarılıwınıń támiyinleniwi boyınsha hújjet. Bunda “Sociallıq qorǵaw birden-bir reestri”ne kirgen shańaraqlardıń perzentlerine ajıratılatuǵın tálim krediti boyınsha girew hám kepillik talap etilmeydi;
“Sociallıq qorǵaw birden-bir reestri”ne kirgizilgenligin tastıyıqlawshı maǵlıwmatnama (“Sociallıq qorǵaw birden-bir reestri”ne kirgizilgen shańaraqlar perzentleri ushın);
birgelikte kredit alıwshıǵa tiyisli maǵlıwmat.

Hújjetler 5 jumıs kúninde kórip shıǵıladı.

Tálim krediti shártnaması tólem-kontrakt shártnamasında kórsetilgen bir jıllıq tólem summasına teń muǵdardaǵı summaǵa dúziledi.

Tálim krediti kredit alıwshıǵa Oraylıq banktıń tiykarǵı stavkası muǵdarında ajıratıladı.

Bunda, Oraylıq banktıń tiykarǵı stavkası tómenletilgen jaǵdayda, tálim krediti boyınsha procent stavkası sáykes ráwishte tómenleydi, Oraylıq banktıń tiykarǵı stavkası asırılǵan jaǵdayda bolsa tálim krediti boyınsha procent stavkası ózgerissiz qaladı.

Usı tártip:

shet el puqaraları hám puqaralıǵı bolmaǵan shaxslarga;
kommerciyalıq bankleri tárepinen Fond qarjılarınan tısqarı basqa derekler esabınan beriletuǵın tálim kreditlerine qarata engizilmeydi.

Qatlamlastırılǵan tólem-kontrakttı hám onıń minimal muǵdarına teń bir mártelik basqa tólemlerdi ámelge asırıw ushın tálim krediti ajıratılmaydı.

Kanalǵa jalǵanıw
@huqiqiymalimleme