2022-02-10 16:29:53
AYTING, MADINAGA QACHON BORAMIZ?
Necha ming chaqirim bugun oramiz,
Xatlarning qatida koʻngil olamiz.
Ey meni duosi yoʻqlayotgan doʻst,
Ayting, Madinaga qachon boramiz?
Ishqida yigʻladik, ishqida yondik,
Ishqi deb dunyoning ishidan tondik,
Umidga suyandik, unga ishondik,
Ayting, Madinaga qachon boramiz?
Koʻngillar qoraydi, tosh qotdi, doʻstim,
Kipriklar uchida yosh qotdi, doʻstim,
Yana umidvorlik asqotdi, doʻstim,
Ayting, Madinaga qachon boramiz?
Sharofat yoʻlini sogʻindi yurak,
Shafoat yoʻlini sogʻindi yurak,
Alloh Rasulini sogʻindi yurak,
Ayting, Madinaga qachon boramiz?
Bori gʻussalardan qochsak barobar,
Salom eshigini ochsak barobar,
Yigʻlasak barobar, toshsak barobar,
Ayting, Madinaga qachon boramiz?
Qarogʻim ichiga toʻlmoqchiman men,
Vujudi muhabbat boʻlmoqchiman men,
Ummati Muhammad boʻlmoqchiman men,
Ayting, Madinaga qachon boramiz?
Ey Nabiy, yuragim toʻldi degani,
Dardimni bir Xudo bildi degani,
Mana, gʻaribingiz keldi, degani,
Ayting, Madinaga qachon boramiz?
Qalbimiz ajib bir sogʻinchga toʻlmish,
Yoʻllarni gʻovlagan alamlar kulmish,
Ikkimizda armon ming bitta boʻlmish,
Ayting, Madinaga qachon boramiz?
Yoʻl boʻyi salavot aytib ketgani
Dilni may, koʻzlarni soqiy etgani,
Meni Baqiy ichra boqiy etgani,
Ayting, Madinaga qachon boramiz?
#Oʻtkirbek Muhammadsobir
@alamiy_uz
1.9K viewsNelly, 13:29