2024-06-15 11:33:32
#мақола #арафа
Арафа кунининг рўзаси ва т
ашриқ такбири Оиша розияллоҳу анҳодан ривоят қилинади:
«Расулуллоҳ соллаллоҳу алайҳи васаллам:
«Арафа кунининг рўзаси минг куннинг рўзаси кабидир», дедилар».
Байҳақий ривоят қилган.
Абу Қатода розияллоҳу анҳудан ривоят қилинади:
«Набий соллаллоҳу алайҳи васаллам:
«Арафа кунининг рўзаси икки йилга каффоратдир: ундан олдинги ва ундан кейинги йилга...» дедилар».
Байҳақий, Насаий, Табароний ва бошқалар ривоят қилган.
Абу Қатода розияллоҳу анҳудан ривоят қилинади:
«Набий соллаллоҳу алайҳи васаллам:
«Арафа кунининг рўзаси сабабли Аллоҳ таоло ундан олдинги бир йил ва ундан кейинги бир йилни каффорат қилишини умид қиламан», дедилар».
Термизий ривоят қилган.
Масала: Зулҳижжанинг тўққизинчиcи, яъни арафа куни рўза тутиш улкан савобларга сабаб бўлади. Унинг шарофатидан бир йил олдинги ва бир йил кейинги гуноҳлар кечирилади. Агар зулҳижжа ойининг дастлабки кунларидан то тўққизинчи кунига қадар рўза тутилса, нур устига нур бўлади.
Фойда: Зулҳижжанинг ўнинчи кунидан ўн учинчи кунигача, яъни тўрт кун рўза тутиш ҳаром. Шу боис дастлабки тўққиз кунда рўза тутиш фазилатли.
Ташриқ такбирининг тарихини биласизми?
Фуқаҳолар таҳқиқотига кўра Иброҳим алайҳиссалом Исмоил алайҳиссаломни қурбонлик қилиш учун бўйнига пичоқ тортганида пичоқ ўтмади. Шунда Aллоҳ таоло Жаброил алайҳиссаломга фидя (қурбонлик қилишга қўй) келтиришни буюрди. Жаброил алайҳиссалом Иброҳим алайҳиссалом Исмоил алайҳиссаломни сўйиб қўйишидан қўрқиб,
«Aллоҳу акбар, Aллоҳу акбар», деб такбир айтди. Иброҳим алайҳиссалом буни эшитиб,
«Лаа илааҳа иллаллоҳу валлоҳу акбар», деди. Исмоил алайҳиссалом ўрнига қурбонлик берилганини билгач,
«Aллоҳу акбар, Aллоҳу акбар ва лиллаҳил ҳамд», деб шукр қилди
«Раддул мухтор»
Маълумот учун: Арафа кунининг бомдодидан 23 вақт намозгача, намоздан кейин бир мартадан такбири-ташриқ айтиш жамоат билан намоз ўқиган кишилар зиммасига вожиб.
Маъноси: «Аллоҳ буюкдир, Аллоҳ буюкдир. Аллоҳ таолодан ўзга илоҳ йўқдир. Аллоҳ буюкдир, Аллоҳ буюкдир ва ҳамд Аллоҳ таоло учундир»
«Қурбонлик сўйишлар ва ақиқага оид масалалар» китобидан
@hilolnashr
11.1K views08:33