2022-07-10 18:45:33
ONAM, DUNYO VA O'ZIM
Bildim endi dunyo nimadir-
Mahzunlardan qolgan iztirob.
Dunyo mening onamni aldab,
Ham otamni qiynagan azob.
Bildim. Bildim dunyo nimadir-
Kuzgi bog'dek rutubat dunyo.
Gul onamga ketmon choptirib,
Xaq bermagan hukumat- dunyo...
Men onamdek mayus bo'lmadim,
Suyagimni g'am ketdi toblab.
Otam, onam haqqi hurmati,
Dunyosini aldadim boplab.
Mushfiqqina yashaydi onam,
Menda savol: NEGA, NE UCHUN???
Beshta xushbo'y gul ekdi axir,
Bu dunyoni yashnatmoq uchun!
Yashnatmadi onamni dunyo,
Lek dunyoni kechirdi onam.
Suv bermadi onamga dunyo,
Ko'z yoshlarin ichirdi onam!
"Toptashmasin, o'tmasin" deyman,
Onam aytar: "Axir yo'lman men".
Iztiroblarga solmas ko'z yoshlar,
Ko'z yosh ichib o'sgan gulman men!
Shundanmikin shafqatim yo'qroq,
Yuragimda kuy tindi mening.
Isyonim yo'q ruhimda yongan,
Olovlarim yo'q endi mening.
Tegirmonlar aylandi tinmay,
Yolg'izgina boshimda mening.
Ko'nglimda bir tirik odam yo'q,
Yigirma uch yoshimda mening!
Ishontirmang men ko'rib bo'ldim,
Ezgulikning yo'llari g'adir.
Ona sizdek yashay olmasman,
Chunki bildim... dunyo... nimadir...
37 viewsShahrizoda Elmurodova, 15:45
Q
