2023-04-04 05:38:51
Yaxshiyam borsiza...
Yaxshiyam borsiz,
Yaxshiyam tutashdi umr yoʻllari!
Boʻgʻib qoʻyar edi sizsiz, shubhasiz,
Meni yolgʻizlikning sovuq qoʻllari!
Yaxshiyam borsiza...
Yaxshiyam siz bor,
Bu tashna koʻnglimning malhami joni!
Kuzga oʻxshab ketgan umrimda bahor,
Yana gullashimning yolgʻiz imkoni!
Yaxshiyam borsiza...
Allohga shukur,
Qorongʻu umrimning nuri, ziyosi!
Mendan soʻramay ham bu yurak qurgʻur,
Sizga alishtirgan yorugʻ dunyosin!
Yaxshiyam borsiza...
Har lahza, har on,
Boringizni bilish oʻzi mukofot.
Allohning suygani, men suygan inson,
Buncha shirin ekan siz bor bu hayot!
Yaxshiyam yaxshisiz,
Hammadan yaxshi,
Tasavvur qilmayman sizsiz qolishni!
Hoy mening umrimning ziynati, naqshi,
Menga ham oʻrgating yaxshi boʻlishni!
Yaxshiyam borsiza,
Yaxshiyam borsiz,
Borki yomonlarga yasagan yakun.
Ming jonim soʻralsin, kechgum begumon,
Sizni bir soniya sevmoqlik uchun!
Yaxshiyam borsiza,
Yaxshiyam borsiz...
Malika Tavfiq
54 views02:38