ҚЎЗИЧОҚЛАР СУКУНАТИ. 3-ҚИСМ III БОБ | 🌙 JUFTI HALOLIM 🌙
ҚЎЗИЧОҚЛАР СУКУНАТИ. 3-ҚИСМ
III БОБ Доктор Лектернинг камераси билан бошқа камералар орасида анчайин катта масофа қолдирилган; унинг ҳар томонлама ўзгача камераси қаршисида биттагина шкафдан бўлак ҳеч вақо йўқ эди. Олд девор мустаҳкам панжарадан иборат бўлса ҳам унинг ортида, одам қўли етмас масофада иккинчи бир тўсиқ – полдан шифтгача ва у девордан бу деворгача чўзилган нейлон симли йўғон ва мустаҳкам тўр ўрнатилган эди. Старлинг тўр ортига боққанида даставвал унинг нигоҳи устида юмшоқ муқовали китоблар ва қоғозлар уюлиб ётган, полга қаттиқ маҳкамланган стол ва суянчиғи текис курсига тушди. Доктор Ганнибалнинг ўзи каравотда ёнбошлаб ётганча «Вог» журналининг итальянча нашри мутолаасига берилганди. У журналнинг симлари олиб ташланган саҳифаларини ўнг қўлида тутиб, чап қўли билан ўқиб тугатганларини бир чеккага тахлаб қўяр эди. Доктор Лектернинг чап қўлидаги бармоқлари сони олтита эди.
