2020-08-01 08:22:59
Ertaga bugungi og'ir kunlarning asorati osonroq bitishi uchun bugun ta'limga va talabalarga imkon yaratilishi kerak
Yaqinda Oliy va o'rta maxsus ta'lim vazirligi matbuot xizmati rahbari Farhod Babashev yangi o'quv yili sentabr oyidan masofaviy shaklda boshlanishi reja qilinayotganini ma'lum qildi.
Endi masalaning boshqa bir muhim jihatiga,
talabalarning to'lov kontraktiga, e'tibor qaratsak.
Birinchidan, yangi o'quv yili boshlanishiga 1 oy vaqt qoldi. Lekin hali eski o'quv yilining kontraktini to'lolmagan talabalar ko'p. Chunki to'lashga imkoni yo'q. Imkoni bo'lsa, shuncha ogohlantirishlarga qaramay to'lardi-da.
Ikkinchidan, Oliy va o'rta maxsus ta'lim vazirligi karantin cheklovlari davrida talabalarga stipendiya to'lovlari vaqtida to'lab kelinayotganini ta'kidladi. Yaqinda O'zbekiston Milliy universiteti matbuot xizmatidan olgan ma'lumotimizga ko'ra, talabalarning stipendiyasi iyul, avgust va sentabr oylariniki bitta qilib, sentabrda berilishini ma'lum qilishdi. "Tepadan" shunday topshiriq kelgan ekan. Oliy va o'rta maxsus ta'lim vazirligi stipendiyalar vaqtida to'lanmoqda, deb yolg'on ma'lumot berdimi?
Karantin bo'lib, odamlar qiyin ahvolda qoldi, shunda ham kursdan kursga qolib ketish vaji bilan talabalarga kontraktni to'lash talab qilindi. Ko'pchilik bir amallab, qiynalib to'ladi. Endi nega stipendiyalar vaqtida berilmasligi kerak?
Uchinchidan, «OTMlar talabalarga masofaviy (onlayn) ta'lim berish joriy etilgani munosabati bilan uni tashkil etish va moddiy bazasini yaratishga qo'shimcha mablag'lar sarflamoqda. Bundan ko‘rinib turibdiki, amaldagi bazaviy to'lov-kontrakt miqdori, o‘qitishning haqiqiy xarajatlariga nisbatan kam. Shu sababli to‘lov-kontrakt miqdorlarini kamaytirishning imkoni mavjud emas», – deb aytmoqda
Oliy va o'rta maxsus ta'lim vazirligi.
Bu gaplar umumiy gaplar, xolos. Oliy va o'rta maxsus ta'lim vazirligi biror joyda xarajatlarning aniq raqamlarini taqdim etmagan.
Masofaviy (onlayn) ta'limni joriy etishga qancha mablag' sarflanmoqda? Nahotki, avvalgi ta'lim bilan masofaviy (onlayn) ta'limning xarajatlari bir xil bo'lsa?
To'rtinchidan, 1-iyundan boshlab, Jahonning nufuzli universitetlarini jamlagan Coursera
onlayn ta’lim platformasi karantin sababli butun dunyo bo'ylab kollej va universitet talabalariga o‘z kurslariga bepul kirish imkoniyatini ochdi. Talabalar uchun 3800 dan ortiq kurslar, 150 mutaxassislar ishtirokidagi interfaol loyihalar, 400 mutaxassislik va 11 professional sertifikatlash dasturlari mavjud edi.
Karantin tufayli Coursera butun dunyoga bepul ta'lim taqdim etganda, nega o'zimizning kelajak avlodga, talabalarga arzonlashtirilgan kontraktdagi ta'limni taqdim eta olmaymiz?
Beshinchidan, kontraktni to'lagan bo'lsa ham, grantda o'qisa ham
, sifatsiz va qimmat internet sabab minglab talabalar sifatli ta'lim ololmayapti. Shu jihatlarga nega jiddiy e'tibor berilmayapti?
Oltinchidan, Prezident Shavkat Mirziyoyev aholiga yordam berish uchun ko'plab qarorlar qabul qilmoqda. Bular, albatta, shu xalqning manfaati uchun.
Davlat rahbari xalqning manfaati uchun tinmay harakat qilayotganda mutasaddilar kontrakt masalasida nega xalqning va talabalarning manfaatiga ish ko'rmaydi?
Xullas, to'lov kontrakt narxlari arzonlashtirilishi kerak. Masofaviy (onlayn) ta'limning xarajatlarini shundoq ham talabalarning to'lov-kontrakti qoplamayapti, degan gaplar juda kulgili va ishonchsiz.
Qayerda, qaysi qonunda yozilganki, talabalarning kontrakti xarajatlarni qoplashi kerak, deb?
Hozir hamma bu balolardan eson-omon qutilib olish haqida o'ylayapti. Lekin undan keyini haqida ham hozirdan bosh qotirish kerak, nazarimizda. To'g'ri, bugun talabalarning to'lov kontraktini arzonlashtirish iqtisodiyotga qanchadir zarar keltirar. Ammo unitmaslik kerakki,
har qanday davlatni, jamiyatni faqat ta'lim qutqaradi va yuksaltira oladi.
Albatta, bu fikrlarning barchasi IMHO.
Kanalga ulanish:
@masofatalim
625 viewsMadina_Bahadirovna. , 05:22