2023-04-25 07:19:19
Mustaqil farzand
Bolalar vaqti kelib tamomila mustaqil bo'la olishlari - bu yaxshi, deb qaraladi men ko'rgan manbada. Hatto, farzand o'stirishdan ko'zlangan asosiy maqsad - bir mustaqil insonni voyaga yetqazish deyiladi ham.
Men esa, shu qismiga, birinchilardan bo'lgan rahmat hadisidan kelib chiqib, "kattalarga hurmat, kichiklarga shafqat qiladigan mustaqil inson"ni voyaga yetqazish - asosiy maqsad deb qarayapman.
Shuningdek, kelajakda farzandimning o'z mustaqil fikri bo'lishi, ba'zan mening fikrimga qarshi fikri bo'lishi ham mumkin. Bu degani - meni yoqtirmaydi degani emas.
Aytmoqchi edimki, farzandlarimiz haqida yaxshi gumonda bo'laylik. Hozir bizga mehribon bolalar, vaqti kelib menikidan boshqacharoq fikr aytishi, o'zi ajralib mustaqil bo'lib chiqishini - menga endi ishonmaslikdan, yaxshi ko'rmaslikdan deb qaramaylik. O'zimizni ham shunga tayyorlashlik kerak, bolalarimiz katta bo'lishyaptimi, biz ham birga katta bo'lishimiz kerakligini sezaman. Masalan, bola 7 yoshlardan oshsa, o'rtoqlarga qiziqib birga o'ynagisi kelsa, onalarda farzandini qizg'anishga o'xshash holat bo'lib qoladi. Kechagina mensiz yashay olmaydigandek atrofimda girdikapalak bo'lgan bolam, endi menga emas, boshqa bolalarga qiziqayotganini qabul qilishga qiynalish bo'lishi mumkin. Hatto bolaga buni aytib, xafa bo'lganimizni bildirib, gina qiladigan holatlar bo'ladi. Boshqa tarafdan qaraganda esa, agar bola shu yoshida ham mening yonimga kirib, yonimdan ketolmay yursa, bu xavotirli vaziyat emasmikan. Bola tengdoshlariga qiziqib borayotgani - o'z yoshiga munosib rivojlanayotganining belgisi ekanini biz kattalar ham qabul qilishimiz kerak.
Faqat, iloji boricha farzandlarga o'z harakatimiz bilan ham, nasihatimiz bilan ham o'rnak bo'lib, "Kattalarga hurmat-izzat, kichiklarga shafqat qilish" kerakligini - ham ko'rsatib, ham gapirib turish kerak deb, shu kunlarda o'zimga maqsad qo'yganman. Agar mana shu hadisni mahkam ushlansa, kattayu kichik odamlar bilan muomalaga kirishishdagi ko'plab muammolarning oldini olsa bo'ladi, deb o'ylayapman.
Bu hadisga asoslanib yashasak, farzandimizga vaqt ajratishni ham og'ir olmay qo'yamiz - unga muomalada shafqatni ko'rsatamiz, xato qilsa, shafqat bilan to'g'rilaymiz - ota-onasi shafqat qilishayotganini, bola ich-ichidan sezsa kerak, ularda shunday sezgi borku. Shafqat ko'rgan bola katta bo'lgach, ota-onasiga ham qaytarsa kerak, deb umid qilish kerak; yaxshi gumonda farzandlarimizdagi ulg'ayishni kuzatish kerak deb o'zimga nasihat qilyapman.
@menvabolam
@globalstudentt
60 viewsedited 04:19