Хитой компанияси Фарғонада когенерация ҳамда кичик ГЭСлар лойи | Фарғона вилояти ҳокимлиги

Хитой компанияси Фарғонада когенерация ҳамда кичик ГЭСлар лойиҳаларига инвестиция киритишни режалаштирмоқда

Вилоят ҳокими Хайрулло Бозоров, Хитойнинг Feng Yuan компанияси раҳбари Гойин Фу бошчилигидаги делегацияни қабул қилди.

Учрашувда Хитой компанияси томонидан Фарғона вилояти ҳудудида замонавий когенерация тизимини (яъни, бир пайтда иссиқлик ва электр энергиясини ишлаб чиқаришни) жорий қилиш, мини-ГЭСлар қуриш, шунингдек биочиқиндилардан энергия олиш бўйича инвестицион лойиҳаларни амалга ошириш масаласи муҳокама қилинди.

Аҳоли ва ижтимоий соҳа объектларини иссиқлик ва электр энергияси билан узлуксиз таъминлашда когенерация ускуналари ўрнатиш муҳим аҳамият касб этаётганини, тўғон талаб этмайдиган ихчам гидростанциялар қўшимча энергия қуввати яратишда катта имконият тақдим этишини қайд этган вилоят раҳбари, Feng Yuan компанияси томонидан вилоят ҳудудида амалга ошириш кўзда тутилаётган лойиҳаларни ҳар томонлама қўллаб-қувватлашга тайёр эканликларини билдирди.

Хитой компанияси, Ўзбекистонда энергетика лойиҳаларини амалга оширишда лойиҳалаштиришдан фойдаланишга топширишга қадар бўлган жараённи ўз ичига олган кластер ташкил этишни ҳам режалаштираётгани маълум қилинди.

Учрашувда вилоят ҳокимининг ўринбосари Иқболжон Эргашев ҳам иштирок этди.

Fergana.uz | Telegram | Facebook | YouTube | Facebook | Instagram | Twitter