#sher Йиллар толиқтирди, йўлларим эмас, Қўл силтаб чарчадим ке | Feruzbek Abdunazarov

#sher
Йиллар толиқтирди, йўлларим эмас,
Қўл силтаб чарчадим келган балога.
Асли балолар ҳам ўзича келмас –
Ўзимни қарғадим, солдим Худога.

Бошимни ёрганнинг бошин силадим,
Тош отган қўлларин сурдим кўзимга.
Ўлимим кутганнинг умрин тиладим,
Омонлик бермадим аммо ўзимга.

Ажаб, юрагимни кечирмадим ҳеч,
Хижолат бўлганча қонга тўлди у.
Аламдан кучланиб эртадан то кеч
Кўксимни муштловчи юрак бўлди у.

Озод қилолмадим елкамни юкдан,
Ўйлар хуржунини туширганим йўқ.
Кўзимни узмадим бир лаҳза кўкдан,
Дилимни кўкларга учирганим йўқ.

Афв этмоқ қанчалар буюк саодат,
Қанчалар ҳаловат, қанчалар ҳузур.
Ўзимдан келгайдир қанча маломат,
Ўзимдан маъзурлик, ўзимдан узр.

Қарғишмас, қайтиш-ла Худога солсам
Гўзал тавба ила ўзимни ҳар гал.
Тавбадор ҳолимга буткул ишонсам,
Ўзимни кечирсам ҳаммадан аввал...

Ўткирбек Муҳаммадсобир