#давоми Тасбеҳ 99 10. У на тирик, Ва на ўлик – Кемада сузи | Farida Afro'z official
#давоми
Тасбеҳ 99
10. У на тирик,
Ва на ўлик –
Кемада сузиб кетаётган кимса каби.
11. Дўстинг қўлингга,
Ёринг ҳуснингга,
Онанг эса йўлингга қарайди.
12. Туғилганда кучли эдик, нақадар,
Нақадар заифмиз,
Ўлаётганда.
13. Нинани ўғирлаганга ҳам
Қонун бор.
Қалбимни нима қилдинг, айт?!
14. Ҳар тонг туриб,
Қалбингни супур, сув сеп, сўлим қил -
Аллоҳнинг уйини.
15. Ақл,
Ҳаммани танитган ҳам,
Айирган ҳам ўзинг!
16. Эй, нодон,
Боланг айтганингни эмас,
Қилганингни қилади...
17. Қани эди,
Пул санаган завқ билан,
Дўстларингни санай олсанг!..
18. Тун.
Қоронғу хужранг бир бурчини ёритиб,
Ухламоқда жажжи набиранг.
19. Эски бир қишлоқнинг,
Эски кулбасида,
Янги даҳо туғилди.
Фарида Афрўз
@Farida_Afroz
