2022-08-20 17:14:31
Bu yolg‘on dunyoning yolg‘onlari ko‘p,
Yolg‘oniga uchgan nodonlari ko‘p,
Yo‘ldan ozdirguvchi shaytonlari ko‘p,
Allohim sen o‘zing to‘g‘ri yo‘l ko‘rsat!
Hayosiz insonga qilmagin oshno,
Topmadim so‘zidan na mantiq, ma’no,
Ularning nazdida devonaman, o,
Allohim sen o‘zing to‘g‘ri yo‘l ko‘rsat!
Ba’zisi do‘stman der, lek ichi qora,
Munofiq yuzini ko‘rsam dil pora,
Pora bo‘lgan dilga bormikin chora?
Allohim sen o‘zing to‘g‘ri yo‘l ko‘rsat!
Maqsadi yo‘lida aylabon makr,
O‘ziga og‘dirib qilganda sehr,
O‘ylamay aytsam gar biror bir fikr,
Allohim sen o‘zing to‘g‘ri yo‘l ko‘rsat!
Ig‘vogar g‘iybatning toshin otganda,
Toshlari ko‘ksimga kelib botganda,
Yaqin deb bilganim meni sotganda,
Allohim sen o‘zing to‘g‘ri yo‘l ko‘rsat!
Na insof, na vijdon bilmaganlarga,
Do‘st bo‘lib, do‘stligin qilmaganlarga,
Sevsam nazariga ilmaganlarga,
Allohim sen o‘zing to‘g‘ri yo‘l ko‘rsat!
Go‘yoki murodi bo‘lgandek hosil-
Ozurda ko‘nglimni og‘ritsa johil,
Netay, ko‘z yoshlarim bo‘lolmas dalil,
Allohim sen o‘zing to‘g‘ri yo‘l ko‘rsat!
Davrada ko‘rolmay noshukr inson,
Yiqitmoq urinsa qidirib nuqson,
Jahlning otiga minsam gar shu on,
Allohim sen o‘zing to‘g‘ri yo‘l ko‘rsat!
Ta’nimni qurshabon olmasdan g‘aflat,
Bir umr sen uchun qilayin toat,
Tun-u kun qalbimga solib hidoyat,
ALLOHIM, SEN O‘ZING TO‘GʻRI YO‘L KO‘RSAT!@Umr_Falsafasi
1.1K viewsN.Ismoilova, 14:14