2022-08-30 12:30:00
Taassuf
Dil deganing shaytonning ini,
El deganing elatmas, elmas.
Tomiringda to‘ng‘izning xuni,
O‘lsang o‘zing yig‘laging kelmas.
Ikki yuzda ikki yuzta yuz,
Bir-birini aldar tun va kun.
Kim "kimlar"ga aylanar, afsus,
Bir mavzuga aylanish uchun.
Bu kunlarning shovuri o‘ktam,
Hovurini bosolmas o‘pka.
Yalmog‘izlar farishta tuqqan-
Parilari chayonni o‘pgan.
Yig‘lay desang yig‘lab bo‘lmaydi,
Diydang qotgan diydiyolardan.
Bilmam, arshning eshigi qayda,
Gunohlarning gardani bardam.
Eskirmaydi balandparvoz gap,
Beri kelmas mazlumlar jardan.
Kuppa-kunduz ko‘zingni bo‘yab,
Toshbaqalar uchar minbardan.
Boshog‘riqman zaminga
men ham
El qatori nafsiga asir..
Bir amallab kafanga sig‘sam,
Xudo, sen ham amallab kechir!
Rashid Xo‘jamov
@eski_fikr | barchasi jiddiy
6.7K views09:30