2023-02-03 02:11:15
СОНЕТ
Тарк этгандай кўкни ҳилоли,
Узилгандай бандидан япроқ,
Чашмасидан оби зилоли,
Сор тоғидан кетгандай йироқ.
Айвонида уясин ташлаб,
Ҳувиллатиб кетган қуш каби,
Ва мангуга юракни ғашлаб,
Зумда кечган қўрқинч туш каби,
Қорлар эриб кетгандай беиз,
Бир чексизлик бўлиб бахтгача,
Бир йўл бўлиб умримдан олис,
Бир армонки - қиёматгача!
Бир лаҳзада, ўша бир кунда,
Ҳаётимдан Сен кетдинг шундай.
Эркин Бозоров
2.3K viewsedited 23:11