Қуйидаги мактуб ўзини Бухоро вилоят туманларидан бирида ИИБ бо | ELTUZ

Қуйидаги мактуб ўзини Бухоро вилоят туманларидан бирида ИИБ бошлиғи деб таништирган шахсдан келди. У берган маълумотларни мустақил манбалар воситасида текширишнинг имкони йўқ. Лекин, мактуб шубҳасиз @eltuz ўқувчиларининг катта қизиқишини уйғотади. Қолаверса, эҳтимолий коррупцияни олдини олишга хизмат қилиши мумкин. Шунинг учун уни тўлалигича чоп қилмоқдамиз. Ўз навбатида, Ички ишлардаги коррупция ҳақида, ҳаттоки ўз камчиликларини ҳам, қўрқмай ёзгани учун бу шахсга миннатдорчилик билдирамиз. Мактубдаги иддаоларни текшириш эса тегишли органлар зиммасидадир.

Салом Туз Оға. Мен Бухоро вилоятидаги туманлардан бирида начальник милиция бўлиб ишлаганман.

Тан оламан, раҳбарлик давримда жуда кўплаб ноқонуний ишлар бўлган.

ИИО тизимида кўтарилиш учун катталарни хизматини қилиш, кўзга ташланиш, илиқ таассурот қолдириш учун буқаламунга ўхшаб минг тусга кириш, юз ниқобини вазиятга қараб ўзгартириб туришга тўғри келади.

Энг асосийси - беришни ва едиришни билишинг керак.

Бухоро вилояти ИИБ бошлиғи Шуҳрат Алиевга ҳар ҳафта 2000$ берганман.

Нима учун дейсизми?

Туманда начальник милиция бўлиб ишлаётганимнинг "шукрона"си учун.

Бугун 2000$ берасан, эртаси куни йиғилишда итдан баттар гап эшитасан. Аямайди - на онанг қолади ва на қизинг.

Бухоро вилоятидаги барча туман ИИБ бошлиқлари ҳар ҳафта ўзига белгиланган соққани шахсан Алиевга киритиб беради.

Агар ДХХ бу ишни пайига тушиб, туман ИИБ бошлиқларини газини бериб сўроқ қилса, ҳаммаси бу маълумотимни тасдиқлайди.

Менда, ҳатто, Бухоро вилояти ИИБ бошлиғи Алиевнинг мендан чўтал олгани видеоси ҳам бор.

Агар уни ошкор қилсам, бошимга оғир кунлар тушишидан бағоят хавотир оламан.

Чунки яқинда ИИО тизими раҳбарлари ҳақида ҳақиқатни гапириб чиққан участкавойларнинг нима аҳволга туширишганини кўрдик.

Мен ўзимни оқламоқчи эмасман. Ҳақиқатан ҳам, кўплаб ноқонуний ишлар қилганман. Кетганман. Алиевга ўхшаганлар ҳам кетиши керак.

Янги кадрлар, тоза кадрлар, ёшлар келмоқда. Уларни қўллаш керак.

Мен ҳам, Алиевга ўхшаганлар ҳам, бу тизимда тоза эмасмиз, қилган жиноятларимизни ҳам тузата олмаймиз.

Ҳеч бўлмаса, ҳақиқий кадрларга йўл очишимиз лозим.

Бу мақола интернетда ўзгаришсиз чиқарилса деган ниятдаман.

Раҳмат!