​​​ИҚРОР Булбулдай севмасман чаманзор сайрин, Ҳар қушнинг чуғ | Дунёнинг ишлари

​​​ИҚРОР

Булбулдай севмасман чаманзор сайрин,
Ҳар қушнинг чуғури битта рубоий.
Эй воҳ тушунмасман, «Лисон ут-тайр»ин,
Мен на Аттордирман, мен на Навоий.

Ишқнинг жамшидида тўлмоқ қайдадир,
Мен ҳижрон базмида тугаган айём.
Май ичиб, девона бўлмоқ қайдадир,
Мен на Машрабдирман, мен на бир Хайём.

Жаллод кундасига тутгум тавоним,
Ўткинчи умрнинг не ғамин ейман.
Ичимдаги ичим - жафокаш жоним,
Мен на Насимийман, мен на Румийман.

Ватан ичинда ҳам Ватан соғинсам,
Йиғлашга қўймаган сабру-тоқатман.
Бемеҳр ишқ ичра куйсам, оғринсам,
Мен на Бобурдирман, мен на Фурқатман.

Ўтган кунларимдан йиғлаб, оҳ урсам,
Ишқнинг дарёсида мавжсиз тўлқинман.
Ул гўзал жамолин тушимда кўрсам,
Мен на Чўлпондирман, мен на Жўлқунман.

Қизғалдоқ баргидай бебахт баҳорим,
Ўлмай, қабрим томон шаҳдам борибман.
«Тилла балиқча» га ўхшаса ҳолим,
Мен на Муҳаммадман, мен на Орифман.

Ўлмасбек Самарқандий.

Каналга уланиш:
https://t.me/dunyoning_ishlarichi