2023-03-06 11:10:03
BAROAT KECHASI YAQINLASHYAPTI
Baroat kechasi Sha’bon oyining oʻn toʻrtinchi kunidan oʻn beshinchi kuniga, 2023-yilning 6-martdan 7-martga oʻtar kechasiga toʻgʻri keladi.
“Baroat” soʻzi arab tilida “ozod boʻlish”, “najot topish” degan ma’nolarni anglatadi. Bu kechaning baroat, ya’ni najot topish, ozod boʻlish kechasi deya nomlanishiga sabab, unda Alloh taoloning rahmati sababli behisob insonlar doʻzaxdan najot topadilar.
Bu qanday kecha?
hadis:Rasululloh sollallohu alayhi vasallam: “(Ey Oysha,) bu kecha qanday kecha ekanini bilasizmi?” dedilar.
Men: “Alloh va Uning Rasuli biluvchiroq”, dedim.
“Bu sha’bonning oʻn beshinchi kechasidir. Alloh azza va jalla bu kecha Oʻzining bandalariga rahmat nazari bilan qaraydi va magʻfirat soʻrovchilarni magʻfirat qiladi, rahm soʻrovchilarga rahm qiladi, dillarida musulmonlarga nisbatan gina, adovat saqlovchi kishilarni qanday boʻlsa, shunday holatda qoʻyib qoʻyadi”, dedilar.
Bu kechada nimalar sodir boʻladi?hadis:
Oysha roziyallohu anhodan rivoyat qilinadi: Nabiy sollallohu alayhi vasallam:
“Bu kechada (ya’ni sha’bonning oʻn beshinchi kechasida) nimalar boʻlishini bilasizmi?” dedilar.
Oysha roziyallohu anho: “Yo Allohning Rasuli, bu kechada nimalar boʻladi?” dedilar.
U zot: “U kechada Odam bolalarining bu yilda tugʻiladiganlari va bu yilda vafot etadiganlari yoziladi va u kechada ularning amallari koʻtarilib, rizqlari nozil boʻladi”, dedilar.
Bu kecha gunohlar magʻfirat qilinadi.hadis:
Abu Bakr Siddiq roziyallohu anhudan rivoyat qilinadi: Nabiy sollallohu alayhi vasallam aytdilar:
“Alloh taolo sha’bonning oʻn beshinchi kechasi dunyo osmoniga (Oʻzining sha’niga muvofiq) tushadi va Allohga shirk keltirgan va qalbida gina, qudrat bor kishidan boshqa barchani magʻfirat qiladi”.
Abu Muso Ash’ariy roziyallohu anhudan rivoyat qilinadi: Nabiy sollallohu alayhi vasallam aytdilar:
“Alloh taolo sha’bonning oʻn beshinchi kechasida rahmat nazari bilan qarab, shirk keltiruvchi va qalbida birorta musulmonga nisbatan gina-adovat saqlovchi kishilardan boshqa barcha maxluqlarini magʻfirat qiladi”.
Abdulloh ibn Amr roziyallohu anhudan rivoyat qilinadi: Rasululloh sollallohu alayhi vasallam:
“Sha’bonning oʻn beshinchi kechasi Alloh taolo bandalariga rahmat nazari bilan qaraydi. Ikkita shaxsdan boshqa barchani magʻfirat qiladi: biri ginachi, boshqasi nohaq odam oʻldiruvchi”, dedilar.
Bu kecha duolar qabul boʻladi.
Usmon ibn Abul Oss roziyallohu anhudan rivoyat qilinadi: Nabiy sollallohu alayhi vasallam aytdilar:
“Qachon sha’bonning oʻn beshinchi kechasi boʻlsa, bas, (Alloh taolo tarafidan)bir nido qiluvchi nido qiladi: «Birorta magʻfirat soʻrovchi bormi, Men uni magʻfirat qilaman! Biror narsa soʻrovchi bormi, Men unga beraman”, deydi. Shu vaqtda kim (qalbidan) soʻrasa, unga (oʻzining sha’niga muvofiq) beriladi. Zinokor hotin va mushrikdan boshqa (Bular oʻzlarining yomon amallari sababidan Alloh taoloning ne’matidan mahrum boʻlgandirlar).
Imom Shofe’iy rohmatullohi alayh aytadilar:
“Bizga shu gap yetdiki, besh kechada duolar qabul qilinar ekan: juma kechasi, iydul azho kechasi, iydul fitr kechasi, rajab oyining avvalgi kechasi va sha’bon oyining oʻn beshinchi kechasi”.
Bu kecha odamlar doʻzaxdan ozod qilinadi.
Rasululloh sollallohu alayhi vasallam aytdilar:
Jabroil alayhissalom mening oldimga kelib, aytdilar:
“Bu sha’bonning oʻn beshinchi kechasidir. Alloh taolo bu kechada koʻp odamlarni doʻzaxdan ozod qiladi. Ularning adadi Kalb qabilasi qoʻylarining junlaridan ham ziyoda boʻladi. Faqat bu kechada Alloh taologa shirk keltirgan, ginachi va qarindoshlik aloqalarini uzuvchi, izorini (manmanlik bilan)toʻpigʻidan pastga tushirib yuruvchi, ota-onasiga oq boʻluvchi va xamr ichuvchi kishilarga rahmat nazari bilan qaramaydi”.
Bu kecha qanday amallarni bajarish lozim?
Xufton va bomdod namozini jamoat bilan ado eting;
Tavba va istigʻfor aytishga e’tibor qiling;
Oʻzingiz va barcha ummat uchun xayrli duolar qiling;
Toqatingiz yetganicha zikrlar, nafllar, Qur’on tilovati qiling;
101 viewsedited 08:10