Суриядаги террористик ташкилот фаолиятида иштирок этган ака-ук | Дайди ўқ

Суриядаги террористик ташкилот фаолиятида иштирок этган ака-уканинг аччиқ қисмати

Андижон шаҳрида яшовчи, 1997 й.т. шахс 2017 йилнинг июнь ойида ишлаш мақсадида Туркиянинг Истанбул шаҳрига бориб, савдо дўконида сотувчилик билан шуғулланади.

Орадан бир йил ўтиб, унинг олдига акаси боргач, улар бирга ишлай бошлашади.
Лекин, диний мутаассибликка берилган, 1995 й.т. ака ўз укасини тўғри йўлдан адаштириб, унга террористик ташкилотлар ва диний экстремистик оқимларнинг ғоявий раҳнамолари бўлган Содиқ Самарқандий, Абдуллоҳ Зуфар, Абдуллоҳ Бухорийларнинг маърузаларини тарғиб қилади ҳамда Сурия давлатига бориб, жиҳод қилиш лозимлигини айтади.
2018 йилнинг куз ойларида ака-укаларнинг каттаси, кейинроқ эса кичиги Сурия давлатидаги террористик ташкилот сафига бориб қўшилишади, бироқ қуролли тўқнашувлар вақтида уларнинг каттаси аянчли ўлим топади.

Бу вақтда эндигина жанговор тайёргарликдан ўтиб бўлган ука ўз акасининг жасадини топиб қабрга қўяди.
Шунингдек, ўша пайтлари террористик ташкилотлар ўртасида юзага келган келишмовчиликлар, амир бўлиш учун етакчиларнинг ўзаро низоларга киришишларини кўриб, хафсаласи пир бўлган андижонлик йигит онаси юборган пуллар ёрдамида Туркияга қайтиб ўтади.
Кейинроқ бир муддат Қирғизистонда бўлиб, сўнгра Қозоғистонга борган ва ушбу давлатнинг сохта фуқаролик паспортини олган мазкур шахс ҳужжатни қалбакилаштиргани учун ҳуқуқ-тартибот идоралари томонидан ушланиб, жиноий жавобгарликка тортилади.
У жазо муддатини ўтаб бўлгач, Ўзбекистонга депортация қилинади.
Жиноят ишлари бўйича Андижон шаҳар судининг ҳукмига кўра, “Тавҳид ва жиҳод катибаси” террористик ташкилоти фаолиятида иштирок этган ушбу фуқаро Жиноят Кодексининг 155/2 ва 244/2-моддалари билан айбли деб топилиб, унга нисбатан 10 йил 1 ой муддатга озодликдан маҳрум этиш жазоси тайинланди.

Ёт кучларнинг таъсирига тушиш оқибатида бир оиланинг навқирон икки фарзандининг аччиқ қисматга дучор бўлиши – бирининг аянчли ўлим топиши, иккинчисининг узоқ муддатга озодликдан маҳрум этилиши бошқаларга сабоқ бўлмоғи лозим.

https://t.me/daydi2021