2022-09-01 05:54:04
Ассалому алайкум азиз юртдошлар, қадрли чортоқликлар!
Сиз азизларни энг улуғ, энг азиз байрамимиз – Ўзбекистон Республикаси давлат мустақиллигининг ўттиз бир йиллиги билан самимий муборакбод этаман.
Айни кунларда бутун республикамизда бўлгани каби туманимизда ҳам Мустақиллик байрамини кексаю ёш, барчамиз биргаликда “Янги Ўзбекистонда эл азиз, инсон азиз” шиори остида кенг нишонламоқдамиз. Бугун
туманимизнинг қайси соҳа ва йўналишларига назар ташламанг, фидойилик билан қилинаётган меҳнат, изланиш ва янгиланишларга гувоҳ бўласиз.Шу маънода мана шундай янгиланишларга ҳисса қўшаётган, тараққиёт стратегияси доирасидаги вазифаларни адо этишда камарбаста бўлиб келаётган нуроний отахону онахонларимиз, фахрийлар, ҳурматли депутатлар, ҳокимият, ҳуқуқни муҳофаза қилувчи идоралар ходимлари, ижодкор-зиёлилар, қурувчи ва тадбиркорлар, фермер ва деҳқонлар, шифокорлар, ўқитувчи ва мураббийлар, шижоатли ёшлар, спортчилар, маҳалла раислари, йўлчилар, ишчи ва хизматчилар, хуллас, барча соҳа вакилларига ўзимнинг юксак ҳурмат ва эҳтиромимни билдираман.
Муҳтарам Президентимиз Шавкат Миромонович Мирзиёев Ўзбекистон Республикаси давлат мустақиллигининг ўттиз бир йиллигига бағишланган тантанали маросимда таъкидлаганларидек, "Орадан йиллар, асрлар ўтади. Лекин миллий давлатчилигимизни, ўзлигимиз ва инсоний ҳақ-ҳуқуқларимизни тиклаб берган, барча ютуқ ва марраларимизнинг замини бўлган Мустақиллик куни биз учун, келгуси авлодларимиз учун доимо энг улуғ, энг азиз байрам бўлиб қолади".
Барчангизга сиҳат-саломатлик, бахту-саодат, хонадонларингизга файзу-барака тилайман. Мустақиллигимиз абадий бўлсин!
Ҳурмат билан,
Анваржон Отаходжаев,
Чортоқ тумани ҳокими
602 views02:54