Қирғизистонда икки музликка БАА ва Саудия Арабистони асосчилари номи берилди
Қирғизистон парламенти 8 июнда Иссиқкўлдаги Ақшийрак чўққисида жойлашган 354-сонли музликни Бирлашган Араб Амирликлари асосчиси шайх Зайд бин Султон Ол Нахаённинг исми билан аташ тўғрисидаги қонуни биринчи ўқишда қабул қилди. Бу ҳақда Озодликнинг қирғиз хизмати хабар берди.
Kaktus media нашрининг ёзишича, шу куни парламент қабул қилган қонун билан Ақшийракдаги яна бир музлик Саудия Арабистони асосчиси номи билан қирол Абдулазиз деб номланди.
Парламентдаги мухолифатчи депутатларнинг айримлари қонун қабул қилинишига қарши чиқди. Аммо депутатларнинг кўпчилиги бу мамлакатлар билан ҳамкорликни мустаҳкамлашга хизмат қилишини айтиб, қонунни маъқуллади.
1966 йилда Абу-Дабинин 17-амири бўлган шайх Зайд бин Султон Ол Нахаён БААнинг асосчиси ва 1971-2004 йилларда унинг биринчи президенти бўлган.
Саудийлар 14-сулоласи вакили Абдулазиз ибн Абдураҳмон ибн Файсал Ол Сауд Саудия Арабистони асосчисидир ва 1932—1953 йилларда қироллик қилган.
