WSJ: Хитой АҚШни кузатиш учун Кубада махфий база ташкил этади
Хитой АҚШни кузатиш учун Кубада махфий база ташкил этади, деб ёзди The Wall Street Journal ўта махфий ҳужжатлар билан таниш манбасига таянган ҳолда. Пекин база учун Кубага бир неча миллиард доллар тўлаб беради.
Нашр манбаларига кўра, база радиолокациявий разведкани олиб боради. Жумладан, маълумотларни тутиб қолиш, турли каналлар орқали олиб борилаётган ўзаро мулоқотларни тинглаш базанинг вазифаларидан бири ҳисобланади.
Манбаларнинг айтишларича, Хитой базаси АҚШнинг Флорида штатидан 160 километр узоқликда қурилади ва бу ердаги Америка ҳарбий базалари ҳамда кемалар ҳаракатини бемалол кузата олади.
Кубада Хитой ҳарбий объектининг пайдо бўлиш эҳтимоли Оқ Уйни ташвишга солмоқда, деб ёзди The Wall Street Journal. Манбаларга кўра, Вашингтон Пекинни ўзининг асосий иқтисодий ва ҳарбий рақиби сифатида кўради.
Нашр манбалари бошқа тафсилотларни ошкор этмади. АҚШдаги Хитой ва Куба элчихоналари ҳам бу хабарга муносабат билдирмади.
