Икки кун олдин бир мижозникига парда масаласида бордим. Куёвни | Bo’ydoqiy
Икки кун олдин бир мижозникига парда масаласида бордим. Куёвни уйи экан. Келин бўлмиш бўлажак куёвга ётоқхона, меҳмонхона ва йўлакни бошдан-оёқ жиҳозлаб бериши керак экан. Бечора қиз отаси йўқ, ўзи эса бироз ногирон экан, шароити ҳам абгор аҳволда. Ўзи доим шу масалада қиз туққанларга ачинаман, бир эркакни бош-оёқ ўзини, оила аъзоларини, уй-жойини жиҳозлаб бериш бу ўзбек оналарини бошига тушган мусибат - тавқи лаънат деса ҳам бўлади.
Келин томон зўрға кун кечиришини ҳисобга олиб куёвникида қилинган иш учун ярим нарх олдим.
Бировни қизини олмоқчи бўлган ўғил бола, туғилганингда сени отанг ўғил кўрганман деб хурсанд бўлган бўлса керак. Эркак бўлсанг бировни қизини латта-путталарини эмас ўзини олгин-да қолган ҳамма камчиликларини ўзинг қилиб бер.
Эркакларимизга ҳам хайронман. Тўй масаласида тизгинни мутлақ аёлларга топшириб қўйишади. Шунинг учун ҳам асосий иш икки ёшни никоҳ ўқиб, маҳрини белгилаб, кичикроқ валийма қилиб уйлаб қўйиш эмас - ким кимга нечи тоғора қандай овқат юборди, кийим-кечак қаерники, мебеллар қайси брендники экани муҳим, домла олдига никоҳга келганда эса баъзилар калимани билмайди. Хуллас ўша ночор келинга ачиндим. Уни ўзига қўйиб берса бу нарсаларни қилишни хоҳламайди, гап-сўздан қўрқади. Мана шу ҳам айни зулмдир. Шу ишга рози бўлганлар эса золимлардир.
Иншааллоҳ мен тўй қилсам ҳеч қанақа ортиқча исрофга йўл бермайман, аёл зотини аралаштирмайман. Бўлажак эркак қуда билан ўзимиз келишамиз, иншааллоҳ саҳобалар қилгандек (шунга яқинроқ) тўй қиламиз. Келин олсам ҳамма шароитини ўғлимни ўзи қилади. Қиз узатсам ҳам шу - қизни иймони ва тақвоси қолиб латта-путтасига кўз олайтирадиганга бермайман.
Ўзи борку, тўйларни схемасини ўзгартириш керак :
Қиз томон қизни узатаётганига ош бериши иҳтиёрли. Иҳчамроқ қилиб ош берсин, амри маъруфга домла бўлсин. Куёв томон келинни уйидан олиб кетишдан олдин никоҳ ўқитиб отасини дуосини олиб кейин олиб кетсин. Куёвнакар ҳам ортиқча. Куёв дўстларига ва келин томонга валийма қилиб беради.
Абдуллох Нурханов
@boydoqiy
