2022-06-17 18:40:28
USTOZLIK MENGA NIMA BERDI?!
Bugun bu yilgi darslarim yakunlandi. Birinchi ish yilim. Birinchi talabalarim bilan xayrlashdim. Shu o'tgan vaqt ichida o'zimni o'zim qayta tarbiyaladim, o'zimni qayta kashf qildim va bu kasbni tanlab adashmaganimga yana bir marta amin bo'ldim. Talabalarim! Ular bilan birgalashib ko'p qiziq kunlarni o'tkazdik. O'qituvchilik chinakam sharaf! O'quvchilaring sen sabab nimadirga erishganini, nimanidir tushunganini, nimagadir harakat qilganini aytganda, "ustoz sizga juda havasim keladi" degan paytda, "siz eng yaxshisiz" deganida buni butun vujuding bilan his qilasan.
Bir talabam bor. Doim juda homush, o'ziga ishonchi yo'q. Atrofdagilari nazarpisand qilmaydigan... Ruhiy holati o'qishiga sezilarli ta'sir qiladi. Bir kuni darsdan keyin qolishini so'radim, uzoq gaplashdik. Va'dasini oldim, birga harakat qilib, hammaga o'zimizni isbotlashga kelishib oldik. Har dars birinchi bo'lib undan so'rashimni va doim ishonch bilan gapirishini, boshqalarga e'tibor bermay o'z fikrini baralla aytishini tayinladim. Shu kundan e'tiboran qizgina astoydil harakat qila boshladi, yuzida tabassum paydo bo'ldi, men bo'lsa har gal uni maqtab gapiradigan bo'ldim. Bugun darsim tugab talabalar chiqib ketayotgan vaqt yonimga kelib, mahkam quchoqlab, rahmat aytib ketdi. Bir insonning qalbida hayotni qayta uyg'ota olganimdan baxtliman.
Bir talabamning aytishicha, men uning uchun ideal ekanman . (Buni eshitganimda kulib yubordim).
Yana birining aytishicha, men uni nimagadir harakat qilishga o'rgatibman. Maqsadlarini qayta yodiga solibman.
Yonimga kelib, "ustoz, siz bilan esdalik uchun bir o'zim rasmga tushsam maylimi?", deb so'rab, iliq mehrini izhor qilib ketdi ko'plari.
Bularni maqtanish uchun yozmadim. Men ular aytgandek ideal ham emasman. Shunchaki, ular menga bergan bu samimiyliklardan ruhlandim. Ustoz degan nomning naqadar ulug'ligini yanada kuchli his etdim. Mas'uliyatim qanchalik kuchli ekanini, vijdonan mehnat qilishim kerakligini va har bir talabamni sevishim kerakligini angladim. Bir talabamning aytishicha, qattiqqo'lligim sabab meni hech qachon esidan chiqarmas ekan, lekin mana shu qattiqqo'lligim uchun ham meni yaxshi ko'rar ekan . Ularning har bir gapini tinglash qiziq, maroqli. Ustoz bo'lish mana shunday narsa. Har qalbda o'ziga xoslikni ko'ra olish va uni yuzaga chiqarish, nima uchun yashayotganini anglatish, o'ziga bo'lgan ishonchini tarbiyalash va u istasa hamma narsaga erisha olishiga ishontira olish. Men har qanday qonun-qoida, tartib-intizomga tupuraman. Men uchun eng asosiysi mening talabam mendan nimadir olishi va shunchaki kimdir emas, o'zini tanigan, maqsadlari bor inson bo'lib yetishishi. Aks holda hammasi bekor. Ana shunday gaplar...
163 viewsDilfuza Isoqjonova, edited 15:40