2022-07-16 15:03:02
Dostoyevskiy "Xo'rlanganlar va haqoratlanganlar"
Bu roman o'z nomiga yarasha xo'rlanganlar va haqoratlanganlar haqida. Ota va bola munosabatlari, sevgi-muhabbat, boylik va ochko'zlik, xiyonat va sadoqat hamma-hammasi shu kitobdan joy olgan.
Knyaz Valkovskiy va uning o'g'li Alyosha o'taketgan xudbin qahramonlar. Yozuvchi knyaz va uning o'g'li, qisman Natasha obrazida egoizm muammosini ko'rsatib bermoqchi bo'lgan.
Knyaz Valkovskiy dunyoning eeeng palid maxluqoti hisoblanadi. Pul uchun har qanday insonni aldashga, xo'rlashga, oyoqosti qilishga tayyor. Hatto o'z farzandlari ham qiziqmas unga. Haqiqiy iblisvachcha!!!
Uning o'g'li Alyosha 22 yosh bo'lishiga qaramasdan hali ham bola kabi beg'ubor, sodda, go'l va ozroq kaltafahm. Unga oshiq bo'lgan Natasha u uchun ota-onasini tashlab uyidan ketadi.
Har bir qahramon ruhiyati, fikri, o'y-xayoli ipidan ignasigacha tahlil qilib ochib berilgani uchun kitobxon ularning ba'zi qilmishlariga ko'z yumadi, toʻgʻrirogʻi, tushunadi. Misol uchun, Alyosha, Natasha va Katya munosabatlari eng ahmoqona munosabatlar. Chunki Alyoshani ko'ngli bo'sh, hammani sevib qolaveradi...
Asar yozuvchi İvan Petrovich tilidan hikoya qilinadi. İvan Petrovich men uchun ideal qahramon. U Natashani shunchalik sevadiki, doim yonida bo'ladi, dard-u tashvishini eshitadi. Hatto u boshqasi uchun yig'layotganida ham uni ovutadi. Xullas, kimdir meni İvanchalik sevsa bu dunyodan armonsiz o'tardim...
Bu asarda eng xo'rlangan obraz— mening bechora Nelliginam va uning onasi. Ular ne-ne og'ir kunlarni boshlaridan kechirdilar. Nelli kichik jussasi va mitti yurakchasi bilan qancha dard-u tashvishlarga, xo'rliklarga chidadi.
Bu asardan olgan eng katta sabog'im bu — qaror qabul qilishdan oldin yaxshilab oʻyla! Chunki bu qarorlaring nafaqat sening, balki, yaqinlaringning ham taqdirini izmidan chiqarib yuborishi hech gapmas.
Kim uchun kimdan voz kechayotganingni, kimni yoki nimani qurbon qilayotganingni yaxshilab oʻylab koʻrish kerak. Chunki qurbon bo'layotgan narsa ota-onangning sha'ni, qadr-qimmati, farzandlaringning kelajagi bo'lsa bu yo'ldan qaytgan ma'qul. Xullas, yaxshi kitob.
Va yana shuni unutmaslik kerakki, ota-onasini norozi qilgan har bir farzand hech qachon baxt nimaligini bilmaydi...bilolmaydi!
@Yosh_kitobxon_kundaligi
191 viewsedited 12:03