2022-08-28 19:32:53
UZOQ YILLARDAN KEYIN...
Endi bu yerlardan ketib boʻlmaydi,
Poyezdlar orqaga yurmaydi qaytib.
Sizni aldashibdi: sevgi oʻlmaydi,
Faqat poyimizda yuradi daydib.
Endi bu yerlardan ishq topolmaysiz,
Yomgʻirlar yomgʻirday quvnatmas koʻzni.
Changlardan qochasiz, nafas olmaysiz,
Shahar shovqinidan yoʻqotib oʻzni.
Raqamlar ustiga qurilar umr,
Taraqqiyotlardan oʻtib boramiz.
Shubhalar, aldovlar oʻtadi bir-bir,
Bir-bir barisini sotib olamiz.
Endi bu yerlardan ketib boʻlmaydi,
Poyezdda joy yoʻqdir koʻngli yoʻqlarga.
“Siz”ni “sensiraymiz”, koʻngil toʻlmaydi,
Vijdon tomonlardan kelgan oʻqlarga.
“Endi bu yerlar...” deb koʻ-oʻ-oʻp yil netaman,
Bir kun DUNYosi ham tegadi jonga.
Qishloqqa ketar kun kelsa aytaman –
Chirmashib olamiz soʻnggi vagonga...
2016-y.
Dadaxon Muhammadiy
260 views16:32