2021-10-24 14:53:31
O‘RGANMANG
O'rganmang deganda ko'cha boshida ko'rgan itingizni yoki o'qiyotgan kitobingizni nazarda tutmayapman. Insonlarni aytyapman, insonlarni. Ularga o'rganmang. Azob chekasiz, yarim qolasiz, xayollaringiz puch bo'lib chiqadi, pushaymon bo'lasiz. Keyin esa, boshqa birovga ishonishni qo'yib turing, hattoki ko'chadagi boshini silashni istagan mushugingizga ham ishonchingiz qolmaydi. Insonlarga ishonishning badalini har doim eng og'ir shaklda to'laysiz. Sevasiz, ammo sevilmaysiz. Sog'inasiz, biroq sog'ingan kishingiz tomonidan ko'rmaslikka olinasiz. Qadrlaysiz, lekin qadrlagan insoningizning hayotida eng qadrsizga aylanasiz. Butun borlig'im deb sevgan insoningizning hayotida zarracha o'rningiz yo'qligini ko'rib, buning azobini suyak - suyaklaringizgacha his qilasiz. Gapning indallosi shuki, hayotim davomida eng og'ir zarbalarni eng ishonganlarimdan qayta - qayta yeb, to'yganimdan keyin insonlardan kutadigan boshqa hech narsam qolmadi. Ularga qattiq o'rganmayman. Chunki kimga oʻrgansam, har doim azob chekaman, aldanaman, bo'laklarga bo'linaman va keyin parchalarimni yig'olmay qiynalaman. Bularga giriftor bo'lishdan ko'ra, hech kimga bogʻlanmayman. Siz ham insonlarga o'rganib qolmang. Ular o'ta shafqatsiz. Undan ko'ra biror mushukka o'rganing. O'qiyotgan kitobingizga ovuning, ana o'shanga o'rganing. Masalan, o'tirganingizda orom topadigan arg'umchog'ingiz bo'lsin, unga ega chiqing. Agar sevishni istasangiz, moychechaklarni seving. Osmonni seving. Chag'alaylarga non ushog'i ulashishni seving. Yoki bo'lmasa, ko'chadagi daydi itni seving. Ammo qaytarib aytaman, insonlarni sevmang! Sevishga arziydigan shuncha go'zalliklar bor ekan, ichingizdagi toza sevgini noloyiqlar uchun isrof qilmang.
"To‘siqlarga qaramay sevdik"
220 views , 11:53