2022-03-21 05:59:30
Болтабой Бекматов
Б А Ҳ О Р И Л Ҳ О М И
АРАФА
Бир тантана содир бўлажак,
Бир тараддуд кезиб юрибди.
Мийиғида кулимсираган,
Қуёш буни сезиб юрибди.
Новдаларнинг юзида сепкил,
Дарахтлар ҳам бир тараддудда.
Сезилар бир ажиб ҳаяжон,
Йўл четида, каллакдор тутда.
Нами қочган тўнка устида,
Кукулашар бир жуфт кабутар.
Ана, ҳовуз ичра фаввора,
Ҳозир буюк сирин фош этар.
Кезар недир қилиб овоза,
Тилсиз жарчи баҳор еллари.
Сиғмай кетди қўлқопчаларга,
Хонимларнинг нозик қўллари.
Бир тантана содир бўлажак,
Бир тараддуд кезиб юрибди.
Мийиғида кулимсираган,
Қуёш буни сезиб юрибди.
БАҲОР КУНИДА
Гўзалланди чор-атроф,
Наврўз келиб воҳага.
Яшнаб кетди дов-дарахт,
Гул қўниб ҳар шохага.
Қуёш боқар жилмайиб,
Бир илиқлик ҳавода.
Новдаларни эркалаб
Майин эсар шаббода.
Узоқлардан хуш келган,
Қушлар чуғурлашади.
Асаларилар гулдан
Гулга қўнар, шошади.
Чумолилар уйғониб
Аста ғимирлаб қолди.
Балки ишга шайланиб
Меҳнат қуролин олди...
Иш қизийди далада,
Янги ҳосил ғамида.
Тракторлар ер ҳайдар,
Тутун пуркаб дамидан.
Барчанинг руҳи баланд,
Кўтаринки кайфият...
Шундай баҳор кунида
Уйда ўтирмоқ - уят!
БАҲОР ИЛҲОМИ
Мени сармаст этган серфайз баҳорми,
Ёхуд париларга айланган қизлар?!
Ё безовта қалбим бир ишққа зорми,
Бўлдим бир сернаво, шўхчан бу кезлар.
Кўк майса, гулларга кўмилган новда
Вужудда уйғотар ажиб жўшқинлик.
Дилимни қитиқлар сафобахш хаёл,
Бугун ярашмайди асло тушкунлик!
Кўксимни сийпалаб майин шабада,
Ақлимни шоширар қушлар суҳбати.
Фикримда некбинлик, жўшиб ғайратим,
Эллар кезгим келар енгил сабодай.
Саховат кўрсатсам дейман ҳар кимга,
Ҳар кимни қутлагим келар чин дилдан.
Кейин етказса-да озор дилимга,
Бўса олсам дейман сочи сунбулдан...
БУГУН НАВРЎЗ
Бугун Наврўз! Юртда улуғ намойиш!
Одамлар суврату сийратда аъло!
Табиат ҳуснида жило, оройиш,
Янграр ҳар тарафда шеър, қўшиқ, наво!
Қуёшнинг тафтидан баҳраманд замин,
Гулларга бурканиб олмиш дарахтлар.
Ҳис қилиб тинч ҳаёт лаззатин, таъмин,
Уйғонмиш ҳар дилда умидлар, шаҳдлар.
Нигоҳлар самимий, диллар муштарак,
Юракда шижоат уради туғён.
Тилларда такрордир хуш, эзгу тилак,
Саҳоватга мойил ҳар дил, ҳар инсон.
Ҳар дилда яратиш ишқи, хуш чирой,
Бобомерос даҳо шуурга жодир.
Элим дастурхони ноз-неъматга бой,
Инсон заковати ҳар нега қодир!
Халқим узоқ кутган, орзиқиб кутган,
Муҳаббатли кун бу, меҳрли кун бу!
Табиат ўзлигин намойиш этган,
Тароватли кун бу, сеҳрли кун бу!
Бугун Наврўз! Юртда улуғ намойиш!...
270 views02:59