Hindiston Rossiya nefti narxining yuqori chegarasiga rioya qilayotgani haqidagi xabarlar rad etildi
Rossiyaning Hindistondagi elchisi Denis Alipov OAVda Hindiston go‘yoki Rossiya nefti narxiga rioya qilishga rozi bo‘lgani haqidagi xabarlarni rad etdi.
“Aytishim mumkinki, Hindiston Rossiya nefti uchun narxlarni cheklash mexanizmining ishtirokchisi emas. Umuman olganda, bunday mexanizmning samaradorligiga bir necha bor shubha bildirgan”, – deya qo‘shimcha qildi diplomat.
Shu bilan birga, u Nyu-Dehli Moskvadan neft sotib oladigan narx tijorat siri ekanligini va bunday ma’lumotlarning oshkor etilishi “Rossiyaga ham, Hindistonga ham zarar yetkazishi”ni ta’kidlagan.
“Hindiston o‘tgan yil davomida o‘n baravar oshgan yirik xaridlar bo‘yicha AQSHning xohishi yoki istamasligidan emas, balki o‘z ehtiyojlaridan kelib chiqishi aniq”, – deya xulosa qilgan Alipov.
Avvalroq “Bloomberg” agentligi o‘z manbalariga tayanib, Hindiston Rossiyaga qarshi Gʻarb sanksiyalarini buzmaslikka va G7 tomonidan tasdiqlangan neft narxining maksimal chegarasiga rioya qilishga qaror qilgani haqida yozgan edi. Agentlik ma’lumotlariga ko‘ra, Hindiston hukumati banklar va savdogarlardan cheklovchi choralarga rioya qilishni so‘ragan.
@BedarakTv - Энг тезкор янгиликлар ва қизиқарли видеолар каналига обуна бўлинг!
