Фирибгарлик ҳақида долзарб маслаҳатлар Фирибгарлар чангалига | Bank va Mijoz

Фирибгарлик ҳақида долзарб маслаҳатлар

Фирибгарлар чангалига тушиб қолмасликка ёрдам берадиган бир нечта маслаҳатлар, фойдали бўлади деб умид қиламан:

1. Ҳеч кимга ишонманг. Агар сизга танишингиз қўнғироқ қилаётгандек туюлса ҳам, “қизилни босинг”да, ўзингиз қўнғироқ қилинг. Телеграмдаги матнларга ишонманг – аккаунтни сохталаштириш осон, телефон рақамига ҳам ишонманг - уни алмаштириш мумкин ҳозирда. Сизга ёрдам беришни хоҳлашларига ишонманг - одатда бунинг акси бўлади. Иложи борича телефон орқали қайта қўнғироқ қилиб гаплашган маъқул – Телеграмда овозли хабарларни ҳам сохталаштириш унчалик қийин эмас, ҳозирда ҳатто видеохабарларни қалбакилаштиришни ҳам ўрганишган, лекин улар телефондан тўғридан-тўғри қўнғироқларингизни қалбакилаштира олишмайди.

2. Сиздан бажаришни илтимос қилишган ишни амалга оширишга шошилманг. Сизга яқинларингиз ёки қариндошларингиз хавф остида эканлиги, пулингизни ўғирлашлари хавфи борлигини, номингиздан кредит олинганини... ва бошқа кўп “ҳолатлар”ни айтиб беришлари мумкин. Кейин сиздан - шахсий маълумотларни, паспортингиз нусхасини, логин ва паролни, СМС-кодни, курьерга пул ўтказишни ва ҳоказоларни сўрайдилар. Буларнинг ҳеч бирини бажаришга шошилманг, яхшиси биринчи маслаҳатни қайта ўқиб чиқинг.

3. Бор пулларингизни битта картада сақламанг. Ҳозирда онлайн депозит очиш ва исталган вақтда уни онлайн тўлдириш ва ундан ечиб олишнинг кўплаб онлайн усуллари мавжуд. Яна бир вариант - иккинчи банк картасини олиш (бошқа банкдан бўлса яхшироқ) ва маблағларингизнинг бир қисмини унда сақлаш. Албатта, иккинчи картангиз борлигини ҳеч ким билмаслиги керак.

4. Ҳеч қачон шошилманг. СМС-хабарларда одатда кодни ҳеч кимга билдириш керак эмаслиги айтилади. Буни ҳар қандай усулда амалга оширмаслик керак – на оғзаки айтиш, на ёзиб юбориш. Лекин, одатда, биз шошиб СМСни тўлиқ ўқимаймизда, рақамларни илғаб олиб, айтиб берамиз. Агар бирор киши ҳақиқатда сизга ёрдам беришни хоҳласа, у сизнинг жавобингизни кутади, шошилтирмай. Шунинг учун, СМС матнини тўлиқ ўқинг. Айтганча, эслаб кўринг, расмий органлардан (ёки банклардан) сизга чин дилдан ёрдам беришни хоҳлаган, айниқса телефон орқали?! Эслолмадингизми?! Айнан шунинг учун, агар сиздан жуда хавотирланаётган ва ёрдам беришни истаганлар пайдо бўлиб қолса, билингки, уларнинг 95% фирибгарлардир (узр лекин).

Эсингизда бўлсин, нақдми ёки картада бўлишидан қатъи назар, маблағингиз хавфсизлиги ўзингизнинг қўлингизда. Шунинг учун, пулингизга бошқаларни яқинлаштирманг.

Бу маслаҳатларни дўстларингиз ва яқинларингизга улашишни унутманг, балки уларни фирибгарлар қурбонига айланишидан айнан сиз сақлаб қолган бўларсиз.

Манба.

@bankmijoz