Қариндошлар билан шерикчилик қилиш Бизнес амалиётида қариндош | Assoodiq

Қариндошлар билан шерикчилик қилиш

Бизнес амалиётида қариндошлар ёки бир оила аъзолари иштирокида шерикчилик қилиш ҳоллари кўп учрайди. Албатта, шериклар ўртасида шерикчилик муносабатидан ташқари қариндошлик муносабатлари ҳам бўлса, ўзаро ишонч ва ҳурмат янада мустаҳкам бўлади. Бу эса ўз навбатида бизнесни муваффақиятли юритишнинг муҳим омилидир.

Бироқ, кузатувларимизга кўра, кўпинча қариндошлар ўртасидаги шерикчиликда томонларнинг ўзаро андиша қилиши туфайли шерикчиликда шарт бўлган баъзи ишлар эътиборсиз қолиб кетади. Масалан, қариндошлар ўртасида шерикчилик битими ёзма тузилмай, шунчаки оғзаки келишиб қўя қолинади. Натижада шериклар ўзлари муҳим деб ҳисоблаган жиҳатларни келишиб олишади, лекин шерикчиликнинг бошқа жуда кўп муҳим шартлари бўйича келишув амалга ошмай қолади. Вақт ўтгач, келишув оғзаки бўлгани учун ўзаро келишилган шартлар ҳам эсдан чиқиши ёки бошқача тушунилиб қолиши ҳам мумкин. Шунинг оқибатида келгусида низолар, келишмовчиликлар келиб чиқади, бу эса баъзан ўртага совуқчилик тушишига ҳам сабаб бўлади.

Бунга яққол мисол сифатида қуйидаги ҳолатларни келтириш мумкин:

- шериклар ким қанча пул тикиши, ким нима иш қилиши, фойданинг қандай тақсимланишини оғзаки келишиб олишади, лекин мабодо иш юришмай қолса, зарар қандай тақсимланиши, фойда ҳар неча ойда тақсимланиши, ҳисоб-китоб қандай қилиниши, бирор шерик чиқиб кетганда ёки вафот этганда қандай йўл тутилиши, янги шерик қандай қабул қилиниши каби масалалар очиқлигича қолиб кетади;

- бир нечта қариндошлар биргаликда бизнес бошласа, улардан бири пул тикади, қолганлар эса меҳнат билан шерик бўлади, бунда пул тиккан одам бошқаларга «Сизлар шу бизнеснинг 50 фоизига шериксизлар», деб келишади, лекин меҳнат қилаётганлар фақат фойдага шерикми ёки бизнеснинг мулкига шерикми – аниқлаштирилмайди;

- оилавий бизнес қилганда оила аъзоларининг улушлари қанча экани келишилмайди, натижада кейинчалик бизнес катталашиб кетса ёки оила бошлиғи вафот этса, бизнесни бўлишишда низо ва келишмовчиликлар келиб чиқиши мумкин.

Юқоридаги салбий ҳолатларнинг олдини олиш учун қариндошлар ёки бир оила аъзолари бирор бизнес бошласа, шерикчилик шартномасини ўртада ёзма равишда имзолаб олишлари керак. Бу – исломий молия шартларига мувофиқ зарурий шарт ҳисобланади. Бундан ташқари, шерикчилик шартномаси шартларининг қонуний ва тўғри бўлиши учун соҳа мутахассисларига мурожаат қилинса, бизнес келажакда барқарор ва баракали бўлади, қариндошлар ўртасидаги муносабатлар бузилишининг ҳам олди олинади.

Бу борада маслаҳатлар керак бўлса, «ASSOODIQ CONSULT» компаниясига мурожаат қилишингиз мумкин.
Телефон: 55 500 5995

Яқинларга ҳам улашамиз.
@assoodiqconsult – обуна бўлинг.