2022-11-05 07:44:18
Ideal ota qanday bo‘ladi?
Qiz bolaning hayotida birinchi erkak, ulkan suyanch tog‘i, ideal odam, shubhasiz, uning otasidir. Ideal ota – o‘z farzandlariga bir xil munosabatda bo‘ladigan va ularning tarbiyasida turmush o‘rtog‘i bilan birga faol ishtirok etadigan odam.
Siz qizingiz uchun ideal ota bo‘lishni istaysizmi? Quyida buning uchun nimalarga e’tibor berishingiz zarurligi haqida tavsiyalar berib o‘tmoqchimiz.
1. Ko‘proq mehr bering.
Yuqorida qayd etganimizdek, qiz bola doimo otasining mehriga muhtoj bo‘ladi. U kutgan mehrni bera oling. Qizingizning hayoti davomida bu juda muhim o‘rin tutadi.
2. Qizingizga doim yaxshi gapiring.
Yaxshi narsalar haqida suhbatlashing. Otaning qizni qo‘llab-quvvatlashi, rag‘batlantirishi unda ishonchni hosil qiladi. Shunda u o‘zini hurmat qilishni o‘rganadi. O‘zining qadr-qimmati va obro‘sini saqlashga, o‘zini rivojlantirishga intiladi.
3. Qizingizning hurmatini qozoning.
Otaning qizi oldidagi vazifalaridan biri, albatta, uning hurmatini qozonishdir. Qizning hayotida sog‘lom muhit barpo etishingiz lozim.
Agar qizingizning ishonchini qozona olsangiz, u sizni doimo hurmat qiladi va har bir so‘zingizni o‘zi uchun qonun deb biladi. Agar unga kuch ishlatish, bosim o‘tkazish orqali so‘zingizga kiritmoqchi bo‘lsangiz yanglishasiz. Bunda uning isyoni kuchayadi va unga ta’siringizni yo‘qotasiz.
4. O‘g‘lingizga aytmagan gapingizni qizingizga aslo aytmang.
Agar qizingiz yoningizga muammolarini aytgani kelsa, aslo onangga ayt yoki boshqa safar deb qaytarmang. Unga quloq soling. Maslahat bering, to‘g‘ri yo‘lni ko‘rsating. O‘zini zaif his qilayotgan bo‘lsa, unga dunyoda o‘tgan kuchli ayollarni misol keltiring. U ham ana shunday kuchli bo‘lishiga ishonishingizni bildiring. O‘z fikriga ega bo‘lishiga, nimani istayotganini aytishiga imkon bering.
Shunda qizalog‘ingiz kelajakda o‘zini xafa qildirmaydigan, o‘z orzularini to‘g‘ri tanlab olgan holda ulg‘ayadi.
5. Qizingiz bilan muntazam samimiy suhbatlashishni odat qiling.
Hikmatga boy, ibratli voqealarni, hayotiy misollarni keltirib qizingiz bilan suhbatlashishingiz tufayli u o‘zini yanada xavfsiz, qadrli va sevimli ekanini tushunib oladi.
Qizingiz bilan ham samimiy va do‘stona bo‘ling. Suhbat mavzusi o‘zgarishi mumkin, biroq bu orqali qizingizning fikrlari, his-tuyg‘ularini teranroq ifoda etishini kuzatasiz.
Telegram | Instagram | Facebook | Twitter
103 views04:44