ОНАНГИЗНИ КЎРГАНИ БОРИНГ! Нима кўрди дунёга келиб, Айтинг-чи | Aralash tasvir
ОНАНГИЗНИ КЎРГАНИ БОРИНГ!
Нима кўрди дунёга келиб,
Айтинг-чи, бир дардингиз ёринг?
Ҳамма ишни бир четга суриб,
Онангизни кўргани боринг!
Эртага деб пайсалга солманг,
Ишим кўп, деб чарчоқда толманг,
Э воҳ, бир кун аттангда қолманг,
Онангизни кўргани боринг!
Кечалари беуйқу, уйғоқ,
Емирмасин вужудин фироқ,
Йўлингизга тургандир муштоқ,
Онангизни кўргани боринг!
Хира тортган кўзларин нури,
Лекин ёниқ қалбининг қўри,
Бордир балки бирор сўз сири,
Онангизни кўргани боринг!
Сездингизми, анча қарибди?
Вужудидан кучи арибди,
Меҳрингизга илҳақ турибди,
Онангизни кўргани боринг!
Боринг, оппоқ сочларин силанг,
Шодлигига шодликлар уланг,
Худойимдан умрлар тиланг,
Онангизни кўргани боринг!
Ҳеч йўқ, буғдой сўзингиз билан,
Ёки ўғил-қизингиз билан,
Кўриб келинг кўзингиз билан,
Онангизни кўргани боринг!
Эркалатинг, чиройлигим, деб,
Қуёшимсиз, гулойлигим, деб,
Тожу-тахтим, чин бойлигим, деб,
Онангизни кўргани боринг!
Кўрди қанча синов, машаққат,
Дардин ёриб айтмади фақат,
Оёқларин остидир жаннат,
Онангизни кўргани боринг!
Махкам қучинг, сингиб бағрига.
Дармон бўлинг кўнгил дардига,
Зор бўламиз бир кун гардига,
Онангизни кўргани боринг!
Ҳар нарсага топилар имкон,
Ўртамасин кун келиб армон,
Она қайтиб келмас ҳеч қачон,
Онангизни кўргани боринг!
Нима қилдик, онамиз учун?
Синдиринг бас, соғинчлар кучин,
Илтимос, бугуноқ шу бугун.
Онангизни кўргани боринг!
Фурсатдан фойдаланиб, оналаримизни йўқлаб қўяйлик!!!..
https://t.me/aralashtasvirlar
