يعني شوف ابني دائمًا من تشوف جملة مخصوصها محذوف راح تخترع وتگول هسه بالله اني شلون راح اعرف تقديره يعني اگعد اجرب الأسماء كلها؟ أگلك لا مو كلها اصبرلي دائمًا جملة المخصوص بالمدح راح تلگي قبلها جملة وهذهِ الجملة هي الي راح تبين الك المخصوص شنو يعني هاي الجملة چانت تحچي على المخصوص الي رادت تذمه أو تمدحه وبعدين مدحته وما گالت اسمه منو لِأن هي ذاكرته قبل بالجملة الي سبقته (عجوزية ما ذكرت اسمه) مثال توضيحي. الصِّحة نِعمَةٌ مِن الله يَجب عَلينا المحافظة عليها فَنِعمَ ما أنزله علينا الله... هنا لو نجي نشوف المخصوص وين؟ (ما) هنا اسم موصول في محل رفع فاعل وما بعده جملة صلة الموصول وين المخصوص خاتل؟ راح اگلك يابه مو گلنالك هاي عجوزية ما بيها حيل تذكره فگالت اني ذكرته قبل بالجملة الي سبقت المدح انت قدره وحدك اگللها شو بالله هي الجملة الي قبلها عليمن تحجي؟ تگلي غير تحچي على الصحة اگللها هااااا تذكرت اي يعني انتِ جاي تمدحين الصّحة هااااا يعني المخصوص هو الصحة تگلي اي عفية عليك المخصوص( الصَّحة أو هي) لِأن الجملة قبلها دلت عليه وتكلمت عنه....
مثال آخر قال الشّاعر: هوَ دينُ يحيَى مَع أَبيهِ وَأُمِّهِ نِعمَ الصَّبيُّ وَحَبَّذا الشَّيخانِ. نجي نشوف مخصوص (نِعمَ) وين؟ هنا الصّبي هو الفاعل وين المخصوص لعد؟ اگلك شو دباوع على الجملة الي قبله يجوز بيها كلمة تدل عليه أو الشاعر عليمن يحجي شوفه تگلي اي والله لگيتها اگلك شنو هي؟ تگلي انت هو يقصد( يحيى) لِأن هو گال (هو دين يحيى) يعني يقصد يحيى هنا هو المخصوص اگلك اي عفية عليك تقدير الجملة(نِعمَ الصَّبي يَحيى).
زين تگلي هل طريقة بس وي نِعمَ؟ اگلك لا عزيزي وي بِئسَ أو حَبَّذا أو لا حَبَّذا وياهن كلهن ناخذ امثلة وزارية بعد.
