Оҳангаронда диний маъруза эшитган маҳбус калтаклангани айтил | Андижонликлар канали
Оҳангаронда диний маъруза эшитган маҳбус калтаклангани айтилмоқда. Унга нисбатан суд-тиббий экспертиза тайинланган
Тошкент вилояти Оҳангарон туманидаги 48-сонли манзил-колонияда (аввалги 69-сонли) Файзуллоҳ исмли маҳбусни куч ишлатар ходимлар аёвсиз калтаклагани «Sof.uz» томонидан эълон қилинди.
Маълум қилинишича, Майунусов Файзуллоҳ Ҳасан ўғли 1991 йилда Андижон вилояти Избоскан тумани «Чувама» ҚФЙда туғилган. 244-модда (оммавий тартибсизликлар) билан олти йилга ҳукм қилинган. Шу кунларда Файзуллоҳ телефон ишлатиб, унда диний маъруза эшитгани учун калтаклаб жазо берилган.
Ҳолат Зоҳид исмли майорнинг навбатчилигида содир бўлган. Калтаклаш жараёнида колония бошлиғининг ёрдамчи навбатчиси Зоҳид исмли майордан ташқари «начальник опер» Ойбек, «старший опер» Миразиз қатнашган.
« ‘Калонка’нинг аввалги номери 69 бўлган. Уни иккинчи Жаслиқ деб ҳам аташарди. Раҳбари Ж.З. Жумабоев, қаттиққўллиги билан колонкани Жаслиққа айлантирган ҳам ўша. 2018 йилнинг ёзида режими бир оз юмшаган. У олдин бу ерда ишлаб кетиб қолган, кейин яна қайтган. Калтаклаган оперни ҳам танийман, порахўр одам. Маҳбуслардан пора ундиради-да, яна ‘казёллик қилма’, деб дўқ ҳам қилиб қўяди», — деб тушунтирди нашрга эски маҳбуслардан бири.
Таъкидланишича, ўша куни юқорида айтилган кишилар Файзуллоҳнинг оёғининг остига 50 мартадан кўп дубинка билан урган. Калтаклаш жараёнида майор «сенлар ватан хоинисан, сенларни отиб ташлаш керак» деб айтган.
Оқибатда Файзуллоҳ юра олмай қолганидан бошлиқнинг олдига кўтариб олиб чиқишган. Бошлиқ жабрланувчининг аҳволи оғирлигини кўрган ва ўзига келишини ҳисобга олиб 13 кунга ШИЗО (жазо камераси)га жўнатган. Файзуллоҳ ҳозир ҳам ШИЗОда.
Нашрнинг маълум қилишича, маҳбус калтакланиши воқеаси тафсилоти тарқалиб кетганидан кейин Зоҳид исмли навбатчи майорни жазодан асраб қолиш учун вақтинча лавозимидан озод этилган.
«Дарё»га маълум қилинишича, вазиятга ойдинлик киритиш мақсадида Олий Мажлиснинг Инсон ҳуқуқлари бўйича вакили (Омбудсман)нинг қийноққа солиш ва бошқа шафқатсиз, ғайриинсоний ёки қадр-қимматни камситувчи муомала ҳамда жазо турларини қўллашнинг олдини олиш бўйича сектор ходимлари Тошкент вилоятидаги 48-сон манзил-колонияга бориб, маҳкум Майунусов Файзуллоҳ Ҳасан ўғли билан якка тартибда суҳбат олиб борган.
Суҳбат якунлари бўйича маълумотнома тайёрланиб, тўпланган ҳужжатлар прокуратура органларига тақдим этилган ва улар томонидан экспертларни жалб этган ҳолда суд-тиббий экспертизаси ўтказилиши белгиланган.
Мазкур ҳолат Омбудсман назоратига олинган бўлиб, вазиятга ойдинлик киритилгач, натижаси бўйича ОАВга батафсил маълумот тақдим этилиши таъкидланган.
Бундан аввал марҳум турколог Андрей Кубатин қамоқда қаттиқ қийноқларга солингани, Андижонда фуқаронинг қийноққа солиниши ва касалхонада вафот этишига алоқадор ИИО ходимларига суд ҳукми ўқилгани ҳамда Ўзбекистондаги қамоқхоналарда маҳкумларнинг қийноққа солиниши ҳақидаги видеолавҳа юзасидан баёнот берилгани ҳақида хабар берилганди.
@daryo_live
