2023-03-12 12:15:43
#Book_review
#Book5_2023:
G‘arbiy frontda o‘zgarish yo‘q (Erix Mariya Remark)Remark ijodi bilan avvaldan tanish emasman. "G‘arbiy frontda o‘zgarish yo‘q" romani Remark muallifligidagi birinchi roman man uchun. Kitobni maktab kutubxonasidan shunchaki nomi tanish bo‘lgani uchun tanlab olgandim. Romanda Birinchi Jahon urushiga ko‘ngilli sifatida jalb qilingan bir qator o‘spirinlarning hayoti orqali urushning naqadar daxshatli ekanligi tasvirlanadi.
Urush daxshatli, urush shafqatsiz...Frontdagi tahlikali hayotni faqat frontda bo‘lganlar va urushni o‘z ko‘zi bilan ko‘rganlar his qila oladi. Kabinetidan chiqmagan bir hovuch siyosatchi va amaldorlarning qarorlari ortidan millionlab askarlar o‘z hayotini xavf ostiga qo‘yib urushga yo‘l oladilar. Roman qahramonlari ham ko‘ngilli sifatida 19 yoshida urushga yo‘l olgan bir nechta sinfdoshlar bo‘lib, urush ularni juda tez ulg‘aytiradi, 19 yoshidayoq keksa odamlarga aylantiradi. Ular endi oddiy odamlar emas, faqatgina yugurish va o‘ldirish qo‘lidan keladigan tirik murdalarga aylanadi. Ular nafaqat dushman bilan, balki, yashab qolish uchun hayot bilan ham kurashar edilar. Frontdagi turmush sharoiti shu qadar ayanchli edi-ku, ular safdoshlarini yo‘qotganidan unchalik xafa bo‘lmas, qaytanga ularga ajratilgan yegulik ham o‘rtada taqsimlanishidan xursand bo‘lishardi.
Ahvol shu darajada ediki, shunchaki dushman okopidagi yeguliklarga ega bo‘lish uchun ham hujum qilishardi.
Yarador sheriklarini ahvolidan xabar olish uchun shifoxonaga kelishganida esa, yaradorning botinkasiga ko‘z tikishadi. Axir, u baribir o‘ladigan bo‘lsa, yangi botinkaning unga nima keragi bor (!). Sanitarlar esa qo‘lidan hech narsa kelmasligini bilib, yaradorning o‘lishini kutadi. Axir, yarador askarlar juda ko‘p, krovatlar esa yetarli emas...
Romanda ta'sirli sahnalar juda ko‘p, ayniqsa razvedkaga borgan Paul o‘raga tushgan dushman askariga xanjar sanchgani va uni o‘lib qolmasligi uchun yordam bergani meni juda ta'sirlantirdi. Bu Paul o‘ldirgan va uning qo‘lida jon bergan birinchi inson edi...
~ ~ ~ ~ ~ ~
#Iqtibos
Davlat bilan Vatan — bitta narsa emas.~ ~ ~ ~ ~ ~
Nashriyot: Yangi asr avlodi
Toshkent — 2019
Hajmi: 240 bet
Rus tilidan
Nizom Komil tarjimasi
@Alan_Tyuring
18 viewsedited 09:15