2022-08-31 21:40:21
Муборак ташриф ва муборак таклиф.
Муборак Макка шаҳридан Истанбулга дам олишга келган Файсал Ғомидий бир ўзбек дўстидан мен ҳақимда эшитибди. Аввал ҳам эшитган экан ва Истанбулга борсам кўриштиришни илтимос қилган экан. Хуллас, ўша биродарим орқали Файсал билан кўришиб танишдик. Истанбулдан кетгунига қадар ҳам тез-тез кўришиб турдик.
Анча гап сўзимиз бир жойдан чиқиб қолди. Ҳазилкаш, самимий, ҳамма нарсага кўниб кетадиган хушфеъл инсон экан.
Бир куни менга “Қанийди Маккага келсанг, шу дўстлигимизни ишга боғлаб, доим кўришиб дийдорлашиб турар эдик” деб қолди.
Бу таклифдан тўғриси хурсанд бўлдим. Худди Роббим Ўзининг уйидан менга бошпана бераётгандек бошим кўкка етди.
Шунинг учун ҳам мен унинг ташрифини ўзим учун муборак ташриф, таклифини эса муборак таклиф дея қабул қилдим.
Файсал ўзи ҳам бир муддат имом бўлиб ишлаган ва ўз ихтиёри билан ариза ёзиб ишдан бўшаб кетган экан. Балки шунинг учундир менга ўзининг бир маслакдоши сифатида қараб, узоқда туриб менга кўп ҳам ёрдами тегмаслигини ва агар Маккага келсам хар қандай иш топиб ишлашим учун кўмакдош бўлишини изҳор қилди.
Мен учун у ерда ишлашим мумкин бўлган ишлардан бири умра-хаж иши. Чунки, йил бошидан бери икки маротаба бир кишининг қўлида ишчи бўлиб бориб келдим. Ана шу ишларни ўзим ҳам қила оламан, фақат менга меҳмонхона ва визанинг нархлари борасида чуқуррок киришишим учун кўмакдош одам керак бўлаётганди. Файсал мана шу ишларни амалга оширишда айни муддао бўлди.
Файсал Маккага борибоқ ишга киришди ва мен хали етиб бормасимдан виза ва баъзи меҳмонхоналар нархини арзонини топишга эришди.
Бу ҳам унинг менга айтган гаплари қуруқ ваъда эмаслигидан далолат қилади.
Бу ишлар билан бирга яна ўзим учун даъват йўлида ҳам бир қанча ишларни қасд қилдим. Фақат аввал амалга оширмасдан туриб бирор нимани ваъда беришни ёқтирмаганим сабаб уларни айтмасликка қарор қилдим. Аллоҳ у ишларга ҳам муваффақ қилгудек бўлса ундан кейин эълон қилинаверади. Аввал рўёбга чиқсин дедим.
Шундай қилиб, Роббим хоҳласа эндиги манзилим Аллоҳнинг суюкли ери Муқаддас Маккаи Мукаррама. Ҳаммаси Роббимнинг тадбири. Мен у тадбирнинг оддий иштирокчисиман холос.
Фазлиддин Парпиев (Facebook саҳифасидан олинди)
@afiyfun
344 views18:40
A
