2023-04-13 09:25:45
Senator bo‘lajak iqtisodchilarga yangilanayotgan Konstitutsiyani targ‘ib qildi
Bugun Qarshi muhandislik iqtisodiyot instituti tadbirgohida Oliy Majlis Senatining Sud-huquq masalalari va korrupsiyaga qarshi kurashish qo‘mitasi raisi Narimon Umarov ishtirokida seminar tashkil etildi. Unda oliygoh professor o‘qituvchilari, talabalar va ommaviy axborot vositalari vakillari qatnashdi. Seminarda Narimon Umarov yangilanayotgan Konstitutsiyamizning mazmun-mohiyatini yoshlarga tushuntirdi.
-Bir narsani alohida aytish kerakki, Konstitutsiyaning bu matni olim-u mutaxassislar tomonidan o‘z-o‘zidan yaratilmadi, albatta. Balki, dastavval ikki bosqichda keng jamoatchilikning fikri, takliflari o‘rganildi, shundan so‘nggina Konstitutsiya loyihasi tayyorlandi. Birinchi bosqichda Konstitutsiya loyihasini shakllantirish uchun fuqarolarimiz 60 mingdan ziyod taklif berishdi. Ularning asosiy qismi loyihadan joy oldi. Ikkinchi bosqichda Konstitutsiya loyihasi umumxalq muhokamasiga qo‘yilib, ommaviy axborot vositalari, Internet tarmoqlari orqali loyiha bilan 5 million aholi tanishib, 150 mingdan ziyod fuqarolarimiz taklif va mulohazalarini aytishdi. Shu bilan birga, mehnat jamoalari, oliygohlar, mahalla faollari va ziyolilar bilan bo‘lib o‘tgan muhokamalarda ham yana qariyb 10 mingta qo‘shimcha taklif kelib tushdi. Ayni paytda xalqaro-huquqiy hujjatlar va 190 dan ortiq davlatlar tajribasi o‘rganildi, loyiha 6 turdagi ekspertizadan o‘tkazildi. Bugungi shiddat bilan rivojlanayotgan asrimizda yangilanayotgan Konstitutsiyada jamiyatning barcha qatlamlari manfaatlari inobatga olingan. Yangi O‘zbekistonni qurish g‘oyasi atrofida butun jamiyat jipslashgan. Bosh Qomusimiz tom ma’noda xalq Konstitutsiyasi bo‘layotganidan dalolat beradi.
Yoshlar bilan uchrashuvda senator partiyadoshimiz Konstitutsiya loyihasidagi moddalar soni amaldagi 128 tadan 155 taga, normalar soni 275 tadan 434 taga, Asosiy qonunimiz matni qariyb 65 foizga ortganini e’tirof etdi.
Konstitutsiyada O‘zbekiston – suveren, demokratik, huquqiy va ijtimoiy davlat ekani qat’iy belgilab qo‘yilmoqda.
Kuchli ijtimoiy himoya va muhtojlarga g‘amxo‘rlik – davlat siyosatining muhim yo‘nalishi bo‘lib qoladi albatta.
O‘zbekiston – ijtimoiy davlat, deb belgilanayotgani ko‘pchilikni ayni dilidagi ish bo‘ldi. YA’ni, insonga e’tibor hamda g‘amxo‘rlik – davlat va jamiyatning eng asosiy burchi ekani mustahkamlanayapti.
Bosh qomusimizda kambag‘allikni qisqartirish, bandlikni ta’minlash, ishsizlikdan himoya qilish bo‘yicha davlat o‘ziga qator yangi majburiyatlar olishi belgilanayapti. Umuman davlatning ijtimoiy sohadagi majburiyatlari bilan bog‘liq Konstitutsiyadagi normalar
3 barobar ko‘paytirilgan.
Seminarda senator yangilanayotgan Konstitutsiya moddalari va normalari haqida batafsil to‘xtaldi. Xususan, yoshlarning ta’lim olishi, ijtimoiy va tibbiy himoyasi, uy-joyli bo‘lishi, bandligi uchun shart-sharoitlar yaratish – davlatning konstitutsiyaviy majburiyati etib belgilanayotganini alohida ta’kidladi.
-Qadrli yoshlar davlat shu orqali o‘z zimmasiga muhim majburiyatlarni olmoqdaki, mazkur normalar, nafaqat yoshlar manfaati, balki butun jamiyatimiz va mamlakatimizning kelgusi taqdiri uchun muhimdir,-dedi senator.
Senator Narimon Umarov seminar yakunida talabalardan tushgan barcha savollarga javob qaytardi. Seminar ham targ‘ibot, ham savol javob asosida uyushtirilgani foydali bo‘ldi.
Seminar yakunida senator barcha ishtirokchilarni referendumga faol ishtirok etishga chaqirdi.
Akmal Xaitov,
partiyaning Qarshi shahar Kengashi raisi.
23 views06:25
A
