MehrNoz

2022-07-26 12:20:41 Necha yoshga kirganimni aniq bilmayman. “Choliqushi” asarida Feridedan “Necha yoshdasan?”, deb so’rashsa, u quvlik bilan “kimning yonida?” ,deb javob beradi-ku) Men ham har kuni turli yoshga kiraman. Ammo, atrofimda meni menligimcha qabul qiladigan yaqinlarimning borligi, yonimdaligidan quvonaman. Mana, tug’ilgan kunim allaqachon o’tib ketsa ham yosh qizchadek ichimga sigʻmay yuribman. Nima desam…maqtov, e’tibor yoqmaydi desam yolgʻon boʻladi, xursand boʻldim, rossa oʻzimdan ketdim:) Lekin, shukrki, holimiz oʻzimizga ma’lum. Aybgʻinalarimizdan oz-moz xabarimiz bor. Shundoq boʻlsa-da, bizga ehtirom koʻrsatib, mehrli tabriklar yoʻllagan, goʻzal tilaklar bildirgan har bir insondan minnatdorman. Har biringizga javob yozaolmaganim uchun uzr soʻrayman. Tirikligim, yashayotgamimni eslatganingiz, kuch va dalda berganingiz uchun rahmat! Har biringizni yaxshi koʻraman.

@abbosova_mehrinoz Ochish/sharhlash

2022-07-25 19:35:17 Ma’rifatparvar jadid allomalarimizning ilmiy merosini ommalashtirish maqsadida chop etilgan “Jadidlar” kitoblar to‘plami bo‘yicha oʻtkazgan ovozli muloqotimizning yozib olingan audiosi.

@alisher_sadullaev Ochish/sharhlash

2022-07-24 19:13:20 Xayrixohlik

Bu ikki ijodkorning bugun o‘zbek yoshlari orasidagi hurmati yuqori. Bunga ular harakati, mehnati, zarur bo‘lganda, kurashi bilan erishmoqdalar.

1. Javlon aka "Qo‘rqma" chop etilgandan keyin kitobxon uchun kashf bo‘lgandek taassurot qoldiradi. Aslida uning ijodkor sifatida shakllanish jarayoni ancha avval ma‘lum ma‘noda tugallangan edi.

Vatan mavzusida butkul lirik hissiyotlar va yangicha rakurs bilan yozilgan "Buxoro, Buxoro, Buxoro" hikoyasi Javlon Jovliyevning nosirlik iste‘dodiga baho berishga kifoya qiladi.

Javlon aka qalban shoir. Men yurt, millat, insoniyat taqdiri haqida u kabi hissiyot bilan, kuyunchaklik bilan gapiradigan ijodkorni yoshlar orasida kam ko‘raman.

"Qo‘rqma" romani va "Issiq qor" spektakli qandaydir tasodif bilan shov-shuvlarga sabab bo‘lgani yo‘q. Ilk qadam kamchiliksiz bo‘lmaydi. Bu asarlarda muallif o‘zi bilgan va nazardan qochirgan xatolar ham bordir.

Lekin tan olaylik, ulardagi millat fojiasi, yurtning ertasiga qayg‘urish ruhida soxtalik yo‘q. Bu ruh asarlarga shunchalik singdirilganki, ularda muallif yurak bo‘lmalarining qisqarib-kengayib, ko‘krak qafasiga urilib turishini his qilasiz.

Javlon akaning nasri - o‘ziga xos, zamon voqealariga hozirjavob bir nasr. Uning uyg‘urlar fojiasi haqida, Myanmadagi musulmonlar qirg‘ini va ukrainlar jasorati haqidagi hikoyalari bunga misol.

Ma'lumot uchun, Javlon Jovliyevning shu kabi asarlari jamlangan yangi kitob "Anorbooks" nashriyotida chop etilmoqda.

2. Mehrinoz Abbosovani avval Zulfiya mukofotini olgan qizlar qatorida bilardim. Uni tanib, so‘nggi yillardagi ishlaridan xabardor bo‘lganim sari bu mukofot uning faoliyatini baholaydigan mezonlar ichida oxirgi o‘ringa tushdi.

Hali bu mukofotni olgan yoshlar orasida Mehrinozchalik adabiy jarayonni rivojlantirishga qanday ma‘noda bo‘lsa ham xizmat qila olgan birovni bilmayman.

Kichik jamoa bilan respublika darajasidagi adabiy tanlovlarni tashkillashtira olgani, yoshlar orasidagi eng ommaviy ijodiy tadbirlarda uning hissasi borligini ko‘pchilik sezib turadi. Ijtimoiy faoliyat va oilaviy hayot bilan birga badiiy ijodni ham uddalab kelayotgani ham tahsinga loyiq.

Hozir Mehrinozning yosh ijodkorlar orasida tutgan o‘rni, menimcha, juda muhim. Biz hammamiz har joyda nimadir qoralab yuraveramiz. Lekin yosh ijodkorlarning kayfiyatini, xohishlarini, talab va takliflarini hukumat vakillariga yetkazish, yosh adabiy avlodni davlatga tanishtirish, davlat idoralari va ulat orasida ko‘prik bo‘lish vazifasini samarali va natijali uddalayotgan inson Mehrinoz Abbosova bo‘lib turibdi.

___

Shu kunlarda bu ikki tengdoshimiz tavallud ayyomlarini nishonlashmoqda.

Fikr aytayotgan, xizmat qilayotgan odamlarni bu narsa ularning vazifasi ekani vaji bilan ba'zan qadrlamaymiz. Lekin ular bu ishni qilmasliklari ham mumkin edi. Bemalol o‘z tirikchiligi bilan andarmon bo‘lishi mumkin edi.

Ammo ular bugun harakat qilyapti. O‘zidan iz qoldirishga intilyapti. Bu yo‘lda ularga xayrixohman.

@suhrob_ziyo1 Ochish/sharhlash

2022-07-24 10:55:54 ***

1

Mana bugun mening tug'ilgan kunim,
Nega, nima uchun qutlaydi barcha.
Axir nima qildim, neni do'ndirdim,
Tug'ilganimdan to shu kunimgacha?

O'tgan kunlarimni qilgancha tahlil,
Ko'milib boraman tubsiz so'roqqa.
Nega tushunmaysiz, odamlar, axir,
Nimam bor arzirli tabriklamoqqa?

Hali uxloqligim, mudroqligimmi?
Ayting, qanday yaxshi jihatlarim bor?
Yoki o'ta ketgan qo'rqoqligimmi?
Siz jimsiz...so'zimni qilmaysiz inkor.

2

Stolda turibdi haqiqat torti,
Biroq uning ta'mi biroz acchiqroq.
Picha iztirobning ta'mini totib,
Bir bo'lak vijdonga uzatdim barmoq.

Avjga chiqdi ziyofatning davomi,
Qadahlar qo'shig'i, shampanlar raqsi.
E voh, xudbinlikning quyuq sharobi
Ko'ylagimga sachrab ketmadi, yaxshi.

3

Eshik taqillatdi baxt, quvonch, shodlik,
Ochsam, turar bari tutib quchoq gul.
Kirib keldi yangi hamrohim yoshlik,
Ammo, nimagadir ko'nmasdi ko'ngil.

Men yangi do'stlarga qilib iltifot,
Bilmabman u meni o'ksib kutganin.
Sezmabman qadrdon bolaligimning
Qachon, qanday uydan chiqib ketganin.

Mana bugun mening tug'ilgan kunim....

23. 07. 2011-yil. Chortoq

Mehrinoz

@abbosova_mehrinoz Ochish/sharhlash

2022-07-23 21:49:21 Jamoamiz bugun yig'latdi meni. Ko'z yoshim quvonch, shukr, shodlik, rozilik rangida edi. Oxirida dadamning tabrik so'zlari ham bor. Qarshi bo'lmasangiz, bu quvnoq, ta'sirli va men uchun nihoyatda qadrli videotabrikni shu yerda qoldirmoqchiman.

@abbosova_mehrinoz Ochish/sharhlash

2022-07-23 15:56:39 Tug'ilgan kuning – odamlar seni aldashga, sen odamlarga aldanishga moyil kuning

@abbosova_mehrinoz Ochish/sharhlash

2022-07-14 09:56:36 Ishimdan rostdan zavqlanaman. Har kuni yangi g'oyalar bilan to'lib-toshib, shoshib kelaman. Nega? Chunki, qilayotgan ishimizda mazmun borligini his qilaman.

Alisher Sa'dullayev boshchiligida jamoamiz bilan jadidlarning g'oyasini yoshlarga –tengdoshlarimizga singdirish, ularni tanitish orqali o'zligimizni anglashlari uchun qiladigan ishlarimiz rejasini tuzgandik. Ulardan biri 8 ta taniqli jadid allomalarimiz haqidagi eng qaymoq bilimlarni ixcham, yoqimli shaklda kitob holida chiqarish g'oyasi ham bor edi. Kitobning mayda ikir-chikirlari, ko'z ilg'amas jihatlarigacha muhokama qildik, qayta-qayta kamchiliklari ustida ishladik. (Hali ham qandaydir to'lmagan joylari bo'lishi mumkin)

Shu o'rinda jadidshunoslarimizning mehnatlarini alohida e'tirof etishimiz kerak. Behbudiy haqida Zaynobiddin Abdurashidov, Munavvar qori haqida Sotimjon Xolboyev, Abdulla Avloniy haqida Olim Oltinbek, Abdulla Qodiriy haqida Bahodir Karim, Abdurauf Fitrat haqida Hamidulla Boltaboyev, Ibrat haqida Ulug'bek Dolimov, Cho'lpon haqida Dilmurod Quronov, G'ulom Zafariy haqida Olim Usmonovlar kabi professor-olimlarning tadqiqotlari, ishonchli ma'lumotlari asosida ushbu shaklan mo'jaz, ammo, mohiyatan katta kitoblar dunyo yuzini ko'rdi.

Rosti, kitob chiqqanidan beri quvonchim ichimga sig'mayapti. Agar bu kitoblarning o'quvchilari ko'paysa, shu kitoblardan foyda va manfaat oladigan insonlar soni oshsa, yana-da xursand bo'lamiz, kuch va ishtiyoqimiz ortadi.

Barchamizga xalqni xalq, millatni millat qiladigan foydali ishlarga hissa qo'shish baxtini bersin.

Ushbu yo'nalishda yana boshqa yangiliklarimiz ham bor. Hozircha sir bo'laqolsin

@abbosova_mehrinoz Ochish/sharhlash

2022-07-14 09:56:36 JADIDLAR to'plami

@abbosova_mehrinoz Ochish/sharhlash

2022-07-13 17:43:05 https://skyeng.ru/offers/referralinvite/?utm_source=referral&inviterHash=4d5441774e4451324d44673d

#bu_reklama_emas

Do'stlar, o'zimga ravo ko'rganimni sizlarga ham ulashmoqchiman.

2 yil avval pandemiya sababli uyda bo'ldik, buning ustiga chaqaloq bilan edim. Bo'sh vaqtim ko'p bo'lgani uchun o'rganish, izlanish ishtiyoqi yanayam kuchaygan edi. "Birovlar"ga ingliz tilim "o'layotganini", mukammallashtirishim kerakligini aytib, yordam so'radim.
Juda tez yechim topib berdilar.

"Skyeng" platformasida ingliz tili darajamga qarab, istasam rusiyzabon o'qituvchi, istasam, "native" (ona tilisi ingliz tili bo'lgan) o'qituvchida saboq olish imkoniyatim bor ekan. Men ikkinchisini tanladim. Darslarni individual tarzda o'tdik. Ancha yaxshi samara berdi. Orada vaqtimni taqsimlay olmaganim uchun uzilish bo'ldi. Endi ertadan yana boshlayman. (Muntazam shug'ullanib, yaxshi natijaga erishishni Alloh nasib qilsin )

Shu orada shunaqa platforma izlab yurganlar bo'lsa, sizlarga ham ilingim keldi.

Buyog'iga ingliz tilini bilish hayratlanarli emas, ammo, bilmaslik achinarli. Chunki, hozirgi kunda 90 foiz yangi bilim va ma'lumot aynan ingliz tilida.

Orangizda ingliz tilini yaxshi biladiganlar bormi? Alohida kanal ochib, ingliz tilida yuritsammi deyapman. Nima deysizlar?

@abbosova_mehrinoz Ochish/sharhlash

2022-07-09 20:37:41 ***
Xudoyim, bu yo'qlikda
Ko'nglimni yo'qlayversam.
Seni deb yig'layversam,
Seni deb yig'layversam.

Ko'z yoshlarim umrini
cho'za olsa edim men.
Hislarimning suratin
chiza olsa edim men.

Bu hislarda na rang na
shakl-u shamoyil bo'lgay.
Qullarning ko'zi doim
yig'iga moyil bo'lgay.

Tuproq, yo'l bo'lmoq baxtdir,
Maysa, gul bo'lmoq baxtdir.
Barchasidan avlodir
Senga qul bo'lmoq baxti.

Umr bir nafasdurur,
Qachon firoqing basdurur.
Nafs arsloni qamalgan
dunyosi qafasdurur.

Qafasda hurlik manga,
Lek jafo turlik manga
Boshim ustiga poying,
Qulligim qulluq manga.

Qulligim qulluq manga...

2013-yil, Namangan.

Mehrinoz

@abbosova_mehrinoz Ochish/sharhlash